雅虎香港財經 Bossip｜香港盛產三世祖 今次邊個冇褲着？｜Louise
與一位私人銀行家聊天，他説：「今次呢個大風浪，好多富二代頂唔住！」過去五十年香港經濟起飛，基本上揸住香港股票、香港地產就印印腳升值，條命生得好成為「Lucky Sperm Club」成員，有上一代留下的磚頭、股票作為「食邑」，令香港盛產唔少「二世祖」及「三世祖」。
孭重內房債
近排金融界很關注一位富二代，其上市公司瀨咗恒大、富力、佳兆業等內房債，通常上市公司買得，私人錢包又點會冇呢？呢位富二代，年青時喺英國讀書，已有「飛仔」稱號，大搖大擺在倫敦溝鬼妹揸跑車，風光時身邊嘅靚女都如走馬燈。市場人士現正覬覦其山頂、曾一度叫價30億的大宅，有機會要賤價而沽。
分身家要緊
另一富二代被巨浪冚過正着，係已故舖王鄧成波孻仔鄧耀昇，自從波叔去年駕鶴西去，波仔搞落食肆、酒店及老人院在疫情下通通瀨到一褲都係，銀行都落雨收遮，最大鑊係聽聞波叔無諗過自己年事已高，並無立遺囑。
波叔有大房、二房及三奶，各房梗係要鬥快擸嘢，賣家產分錢最實際啦。所謂含着金鎖匙出世之富二代，靠老豆剩落，一個浪冚埋嚟，未必有能力應對？
加上好多富二代心理質素特別脆弱，尤其對住又係老豆又係老細時，你估容易咩？認識一位富二代長子，其父嚴苛至極，以往老豆在世叔伯面前當面「教仔」鬧到佢冇尊嚴，因為老豆要話俾人知佢永遠叻過自己個仔，就喺老豆嘅「鞭策」下，呢位冇尊嚴嘅富二代仍保住啲資產冇敗家，口邊常掛：「創業難，守業就更難！」幾年前有位富豪級老豆當上族長，在記者會上都當面教仔，以彰顯佢族長嘅超然地位。所以二世祖也好，三世祖也好，都要「受」㗎。
邊個冇褲着
十幾年前，曾報道過有位富豪第三代，賣完祖業後遲遲未搬走，激到買家扎扎跳，度咗條幾啜核嘅題「正牌三世祖」，佢老哥不知幾招積反駁：「我係三世祖又點呀？吹咩？又唔係同你借。」在97金融風暴後，亦曾經冠以「正牌二世祖」之名予米王曾紀華個孻仔曾文能。
每個風浪都淹沒一些富二代，如今全球經濟攬炒，財富大洗牌。還是做個小市民，笑看水退邊個冇褲着咪幾過癮。
Louise
https://www.facebook.com/louisewong15
註：專欄作家言論不代表本網立場
密切留意BossMind動向！立即CLS
Powered by Mercury
