雅虎香港財經 CFO財報解密│一個對蘋果影響更深嘅潛在風險（Benny）
自從蘋果（AAPL）喺6月中開發者大會公布多項iPhone AI 功能後，市場憧憬新一代iPhone會有一股換機潮，從而令疲弱嘅硬件銷量有機會回復強勁增長。股價於是由6月中到而家升咗超過15%。但喺剛過去嘅6月尾，歐盟對今年3月已經生效嘅數字市場法案（DMA）公布初步調查結果，認為蘋果違反緊DMA法例要求：
「App Store rules are in breach of the Digital Markets Act（DMA) as they prevent app developers from freely steering consumers to alternative channels for offers and content.」
DMA冀科企擁抱競爭
DMA嘅核心精神唔係唔畀科技巨企賺大錢，而係要佢哋面對、擁抱競爭。唔可以利用龐大市場影響力，規避競爭、造成壟斷，從而令用戶唔可以享受更平價購買軟件、服務嘅機會：
「Under the DMA, developers distributing their apps via Apple's App Store should be able, free of charge, to inform their customers of alternative cheaper purchasing possibilities, steer them to those offers and allow them to make purchase」
最經典例子，就係蘋果iOS唔俾用戶喺其他平台下載軟件，而一定要喺AppStore下載。於是所有軟件開發商都必須向蘋果交30%「蘋果稅」，先可以畀用戶喺iOS下載佢地嘅軟件。
因為用戶冇得揀喺其他平台下載，所以蘋果先可以收取高昂嘅「蘋果稅」，係直接封鎖咗用戶選擇權之下，規避競爭以後嘅暴利（成本最後轉嫁俾用戶）。所以DMA最簡單、具體嘅要求係：開放下載軟件途徑嘅選擇權俾用戶，如果到時用戶都只係選擇喺AppStore下載軟件，即係喺競爭嘅洗禮之下，佢依然可以賺取高昂嘅利潤，咁就完唔係問題。
當然呢個法案喺今年3月生效之後蘋果的確推出咗相應措施應付法規要求，但係似乎佢哋都係換湯不換藥，表面功夫做咗容許軟件開發商喺iOS提供內部連結俾用戶喺iOS以外嘅平台下載軟件。
但係歐盟所觀察到蘋果實際法規執行情況係：
雖然iOS已提供外部連結，但就限制開發商向用戶溝通、提供折扣優惠嘅資訊（提供選擇但限制重要資訊、溝通，令競爭變得唔完整合理，都係防礙競爭行為）。 當用戶從發開商連結購買數碼產品時，蘋果向開發商收取毫不必要嘅費用（開放競爭但又要從競爭者收取補貼）。
歐盟緊盯 風險難忽視
呢個初步調查結果說明，雖然蘋果已經採取措施應付相關法律，但細節上歐盟依然盯得好緊（或者蘋果措施只係敷衍了事，做啲小動作去防礙競爭），於是歐盟有理由重新展開深入調查蘋果有無違反法案（如果最終裁定違反可罰款10%全球收入）。
正常都會預計到蘋果冇可能一步到位跟足晒DMA去做，跟足晒即係完全破壞咗自己iOS生態系統嘅護城河，所以佢一定係一步步試探歐盟嘅底線。
但係始終呢個法例嘅大方向就係要你擁抱競爭，而蘋果其中一個核心價值護城河就係唔使面對競爭，先會令佢嘅服務業務有超過70%嘅超高毛利率，兩者之間存在根本性矛盾。
再加上除咗歐盟區之外，其實美國都有州份對蘋果有類似嘅法庭裁決。所以長遠嚟講，呢啲反壟斷趨勢未必只係局部地區嘅情況，而係全球大趨勢。
就算AI概念真係會引發一股換機潮，但長遠嚟講都唔會解決到呢種會逐漸蠶食蘋果核心價值嘅反壟斷大趨勢。或者呢個就係股神巴菲特連續兩季減持蘋果，除咗佢表面所講嘅稅務因素以外，冇講出口嘅另一個關鍵原因。
Benny Yam
執業會計師
本欄隔周三刊出
