雅虎香港財經 CFO財報解密│收息股你會揀中海油定中移動？（Benny）
中海油（0883.HK）最新中期業績披露2023年上半年，每桶油賣73美元，同比上年同期103美元一桶跌咗29%，所以就算銷量升咗9%，但收入依然要跌5%，股東應佔純利更要跌11%。
美股外幣即時報價 多國新聞任睇
中海油股價創3年新高
但出奇地，佢股價最近創3年新高，係唔係因為市場覺得佢利潤跌幅好過預期？定係因為銷量接近一成升幅？其實乜都假，係因為最近國際油價創近期高位，而中海油係做石油上游業務，利潤絕大部份都跟住油價走，所以市場對佢又有新憧憬。
中海油跟國際油價走
中海油雖然已經回A，避開咗海外金融市場嘅制裁影響，但無奈做嘅絕大部都係上游勘探、賣原油業務：佢嘅原油銷售價格係跟住國際油價而定，而作業成本好大部份都係固定成本波幅唔大，所以造成收入同Profit Margin都係好受國際油價影響，即係話佢嘅業務表現，依然係好受外部因素影響。
因為國際油價嘅變化係受地緣政治關係、產油國計劃產油量、俄烏戰爭、經濟景氣等等多方面因素綜合影響，而呢啲因素加埋一齊，結果就係好難估同無得估。所以問中海油有冇前景，其實就係問緊國際油價係唔係會繼續升？難度好高。
中移動業績勝在穩定
中移動（0941.HK）同中海油都一樣已經回A、派高息、又係阿爺親生仔，但係佢地個underlying業務產品太唔同：電訊同石油。中移動嘅業務增長就係以雲業務轉型+5G為佢中國國內10億電訊用戶提供更多多元化移動端服務內容，而佢嘅銷售單價，就係ARPU人民幣40幾蚊。
呢個數望落好低，但就係因為咁低，對大部份用戶嚟講就算經濟差、收入差，點cut日常消費都未cut到流量月費。即係話你唔會見到好似油價咁，一年之間有29%嘅波幅。同時間，好難有短期因素可以影響用戶嘅上網時間，變相中移動業務嘅量、價都係高度穩定。
但佢仲有無增長？有。中移動最新中期業績，收入升6.8%、股東應佔純利都有8.4%增長，唔高速但增長穩定地多過中海油，而且係一個高度可預測嘅情況下穩步增長，唔會有油價週期性嘅波動效應。
所以當認清咗呢兩隻國企收息股嘅特質後，關鍵問題係：你想長期持有收息，但如果個股價係highly correlated to高波動性無得估嘅油價，當油價下跌股價又會下跌，隨時賺息蝕價嘅情況下，你又點會可以安心長揸收息呢？
Benny Yam
執業會計師
Facebook：https://www.facebook.com/cfobenny/
Patreon: https://Patreon.com/Cfo_benny
本欄隔周三刊出
