雅虎香港財經 CFO財報解密│蘋果睇淡理據漸浮現（Benny）
同時服務業務增長亦都會受制於監管因素，所以將目標價降低1蚊。
美股外幣即時報價 多國新聞任睇
中國銷量走弱未必係蘋果獨有問題，而係整體國內消費市場有機會因為通縮而走弱，繼而影響蘋果手機銷售表現。同時國產手機嘅競爭，無論喺價錢上、定係打國情牌上都會進一步打擊蘋果產品銷量。
但出乎意料嘅係，當Barclays嘅唱淡報告出咗無耐，蘋果就真係喺中國官網減價出售iPhone同其他硬件，當中歷性地包括最新iPhone機型。蘋果拖都唔拖之下就以實際行動迅速「和應」Barclays說法，足以說明管理層呢個時候的確對國內市場信心不足，急不及連最新型號iPhone都要減價出售去庫存。
服務業務不確定性風險大
服務業務佔蘋果總收入約25%，但就貢獻約60%毛利潤，毛利率有70%，係硬件毛利率嘅兩倍，可見服務業務先係蘋果盈利能力嘅引擎。蘋果而家有10億付費用戶、20億硬件注册用戶，每人每季俾多幾蚊，已經可以為佢服務業每季貢獻20億、30億嘅收入增長。呢個係Tim Cook sell服務業務畀資本市場嘅賣點。
但上年9月生效嘅歐盟數字市場法案（DMA）要求蘋果喺6個月內要畀用家可以喺第三方平台下載各類iOS嘅Apps，即係唔一定要喺蘋果嘅AppStore下載。需知道而家嘅iOS Apps全部都係要由AppStore度下載，而每個App嘅下載，AppStore 就會向開發商收取30%費用。
但如果以後收費App嘅下載，蘋果要開放畀AppStore以外嘅其他平台，咁無人願意再畀蘋果30%咁高嘅服務費（除非佢降低服務費率）。咁最直觀潛在影響就係AppStore收入由以往無競爭、高利潤率，變成自我開放、擁抱競爭嘅局面。
你話最多都只係歐盟地區者，但唔好意思，喺上星期蘋果啱啱俾美國最高法院否決佢就關於加州地方法院對AppStore嘅反競爭法裁決。相似地，加州地方法院同樣係要求蘋果喺個AppStore要加一個連結或者按鍵，畀用家可以有直接向Apps開發商買Apps嘅選擇，而唔一定要透過蘋果AppStore買。其實效果同DMA一樣不過而家就喺美國加州發生緊。
AppStore下載挑戰可蔓延
而AppStore要開放下載選擇權呢樣嘢，其實係有機會由一個司法管轄區蔓延開去到其他司法管轄區。因為當Apps開發商見到加州嘅案例、歐盟嘅DMA，而佢哋又夠資源喺司法上挑戰AppStore嘅獨家下載地位，佢地會好大誘因去嘗試打破AppStore呢種壟斷性。
而家最大嘅變數係究竟蘋果內部有無應對策略去減低個負面影響？當然管理層呢一刻仲係未對呢啲反壟斷嘅監管有具體嘅對策同回應，所以嚟緊2月頭蘋果業績會一定會係分析師問題嘅焦點。
Benny Yam
執業會計師
Facebook：https://www.facebook.com/cfobenny/
Patreon: https://Patreon.com/Cfo_benny
本欄隔周三刊出
