雅虎香港財經 CFO財報解密│衰退領先指標Sahm Rule 點解咁準？（Benny）
今個星期一，因為經濟衰退擔憂加劇，美國三大指數顯著下跌。道指跌約1,000點，跌幅2.6%，係近兩個月收市低位。納指及標普500都創3個月新低，跌幅同樣超過3%。
美股外幣即時報價 多國新聞任睇
衰退恐慌觸發股市大跌
有人問究竟後市走勢會係咩方向？今次只係一個調整？定係更大跌幅甚至金融海嘯嘅先兆？
好Honest 咁講冇人可以畀到一個好準確答案。好多人都覺得而家經濟感覺仲係強勁，AI發展又會促進生產力、提供無限可能。
觸動市場大跌嘅係上周五美國7月份嘅失業率4.3%，觸及咗自從1970年代以來都未試過失準嘅衰退領先指標Sahm Rule 衰退界線去到0.53%。即係近三個月平均失業率高出最近12個月當中最低連續3個月平均失業率0.5%，就會觸發衰退。
指標原理唔係講緊失業率要去到幾高先會引發衰退，而係講緊失業率上升嘅速度突然加快，就會引起惡性循環：即係短期內因為失業人口突然增加，令到消費市場嘅動力急劇下降影響企業利潤，令企業需要進一步裁員（失業率進一步上升）嚟保護利潤，最終導致經濟加速惡化嘅一個惡性循環。
消費走弱 恐現惡性循環
當然目前有聲音話今次失業率加速上升，係因為勞動市場人口短期增幅加速，並唔係企業裁員加劇，所以同以往對衰退有高指導性嘅作用唔同。
但諗深一層，勞動人口突然增加都係代表多咗以前唔需要工作都可以維持生計嘅人，呢一刻佢哋嘅個人經濟情況出現問題，需要被迫出返嚟工作賺取收入維持生計（但重點係佢哋係未搵到工），所以佢哋都會減少開支影響消費市場。
所以失業率短期急升，無論係多咗勞動人口定係多咗企業裁員都係講緊消費市場可能急速出現問題或者走弱，從而造成經濟衰退嘅惡性循環。
股神巴菲特曾經講過，佢有80年喺美國市場投資嘅經驗，足足係成個國家歷史嘅三分一時間。短期對經濟嘅預測係冇意義嘅，但係政府長期入不敷支係有後果嘅。佢要專注做嘅係點樣管理好巴郡抵禦風暴嘅能力，令呢間公司喺經濟崩潰或者金融海嘯嘅時候可以安然渡過難關。
人可以預測經濟幾時崩潰，但係巴郡持續創新高嘅現金水平，同埋連佢長期持嘅有愛股蘋果佢都毫不猶豫連續三季減持（喺今年第二季更係大幅減持一半）；仲有7月開始減持同樣長期持有嘅美國銀行股份，你就知佢又係做緊抵禦經濟衰退嘅防風措施。
Benny Yam
執業會計師
本欄隔周三刊出
