雅虎香港財經 【大茶飯】名不副實的基金名字（青冰）
這個周末心血來潮，青冰搞一搞自己的保險，因為依稀記得有一份投資相連保險，當初都揀了些基金，係時候重檢一下，細看後當堂嚇了自己一跳，N年前當日年少無知，竟然會揀了一隻亞洲機遇基金及一隻印度基金，更令人驚訝的是，原來亞洲這十年來的發展，比印度更差，因為隻基金仲要輕微見紅，咁冇辦法了，無理由平時炒股就做足功課，這些就求其了事，花了一個下午，終有所得著。
其實要睇隻基金得唔得，絕對不能只看品牌，更加不可以相信個基金名，因為好多都名不副實，先唔講賺唔賺錢，但投資者大多都比較懶，千百隻基金，難道每隻都去睇咩，將心比己，經紀或顧問亦唔一定會遂隻睇，所以個名就好緊要喇，可以「化繁為簡」。
以青冰的例子，亞洲機遇基金，按基金便覽，係會投資具增長潛力的亞洲公司，包括投資市值低於10億美元的中小型公司。好喇，基金十大持股係，阿里巴巴(9988)、三星電子、中移動(0941)、友邦(1299)、長和(0001)、台積電及騰訊(0700)等等。以青冰微末的知識來看，這些公司都是超級藍籌，但增長潛力呢，中移動及長和應該稍遜吧，再看地區分佈，45%中國，15%韓國，11%香港，對亞洲的定義，又有新的體會了。再細看截至8月底的中期財表，可看到基金全面的持股狀況，當中的確有些中小型股的，如味千(0538)、九興(1836)、呷哺呷哺(0520)及數碼通(0315)等等，在印度、韓國及台灣的股都有5至10隻，不過青冰一睇個名，都係識嘅，即係話，市值細極有限啦。
決心揀過其他基金，自然又要花些少功夫，不過現在搵料實在易，幾個click已經找到，本來對東盟基金有興趣，點知細看之下，金融類別達兩至三成，並不吸引，跟住搵到隻環球農產品基金，似乎不錯，八成持股來自美國，點知最近5年的累積回報是負數，興趣又大減了，喂侵侵叔，你不是要大力支持農業咩？仲有一隻亞洲特別機會基金，真係非常特別，十大又係台積電、巴巴、三星、騰訊、友邦及中石化，總而言之，睇名買基金，真係信唔過呀。
最後揀到的是兩個行業基金，名副其實，揀股又合理，消磨了一個下午也是值得的。
--
