雅虎香港財經 FI專欄｜社交圈VS是非圈｜Louise
防疫措施逐步放寬，商界陸續蒲頭出席社交活動。 一聚頭，同普通師奶阿叔無咩分別，就是八卦近排邊個 「當紅」，邊個「PK」，收到唔少過癮料，又點會獨食，當然要同FI嘅讀者分享。
食阿公的家族
上週四（9月29日）由Fullerton酒店贊助，公益金同今屆香港小姐搞咗個晚宴，唔少社會名流俾面出席，席上有大生銀行馬氏家族後人馬清揚，有人走埋佢老哥身傍說:「你呢期好紅喎。」成為離婚主角嘅馬清揚應哂景，佢八十年代已經係公子哥兒， 娶咗香港小姐錢慧儀做老婆，最近終於離婚，但就被前妻bad mouth，爆料話被逼住無窗黑房兼訓摺床，有啲阿太不平則鳴，謂佢兩公婆分開樓上樓下住，每層有成二千幾呎又點會訓摺床。
大生馬氏家族算係香港豪門家族，成立家族Trust的先行者，目標係防子孫敗家，後人以受益人身份每月有糧出食阿公， 乜使費都喺向公司申請開數， 就連離婚官司嘅使費都開到數，你話幾「得意」呢？
男方嘅友人就替馬清揚不值， 謂梗有「軍師」係女人背後教路，仲話吼住馬清揚做東華三院主席先至來「郁」佢，有哂部署。 通常上流社會搞離婚仲要「唱衰」對方， 都係「錢」字作怪。
香港仍有唔少食「阿公」嘅家族， 包括霍啟剛個家族，李嘉欣老公嘅許晉亨家族等等，就連梅艷芳都係成立個trust，梅媽先可以長食長有。
賴皮富豪炒燶油
早兩年， 有位吋爆嘴的富豪被「細佬」富豪入稟法院追一億幾銀，商界八卦佬都竊竊私語，近排呢位富豪級債仔，仲惡過債主賴皮唔還錢，其他債主都騰雞跟隊揾律師入稟追佢三億 ，聽講吋嘴富豪衰在睇淡石油，但油價年初攀上至130蚊美元桶， 睇淡油價嘅佢重傷入肉。
怪不得變得咁鵪鶉，同昔日大義凜然上身，媽叉兩屆特首時嗰個樣， 真係不能同日而語。 最大鑊係，佢想賣資產套現都難，聽講佢已經由山頂搬到去中半山，騰出來嘅豪宅以4億放售，但無人問津。
瑞信戶口定存危危乎
有啲早前搬左錢去新加坡既濶佬，以為穩穩陣陣做下定期存款保住個本，不過就揀錯銀行了，存咗係頻危爆煲嘅Credit Suisse戶口，分分鐘步雷曼後塵，此君知驚寧願唔要利息提早攞錢走，sorry 私人銀行條款魔鬼在細節， 同你一般銀行做定期唔同，咁容易俾你囉錢走咩？
10月27號呢間危危乎嘅投行將宣佈重組，到時唔知有乜大大鑊公佈，呢位有錢佬定存到期日如在27號後，都咪話唔驚。
四太且戰且退
澳博 (880)公佈四太梁安琪將旗下持有賭牌的澳娛綜合股份一成股份，以一蚊雞轉俾二房的何超鳳，更擔任為常務董事，明眼人睇四太即退下火線，此舉會否是續賭牌條件之一呢？
洗米華單案仍在審理，以往四太對佢十分支持，去年洗米華被拉後，傳聞四太曾經在澳門文華東方酒店「被」Staycation一段時間，可能都係同官員傾下計咁啦。
最諷刺係，此酒店屬何超瓊的信德(242)旗下。洗米華案件仍在審理 ，四太避下風頭都好，其實佢身體都大不如前， 搵埋咁多錢幾世都食唔哂喇， 咁大壓力做乜呢？
紅顏知己一身傷
內房債爆煲後屍駭遍野，唔單止富豪損手，「攬」住佢哋嘅紅顔知己亦血流成河，有位跟咗個七十歲富豪的女子，成手佳兆業，富力，及恒大嘅債，就連手頭嘅快手(1024)都係IPO價入，點算？套用死鬼曹仁超一句，「木哉羊」。
Fortune Insight 聯乘 《華爾街日報》推出全新訂閱計劃「FI Prime Plus」，只需WSJ官網原價三分一價錢，即可同時暢讀《華爾街日報》全網內容和Fortune Insight大部份收費內容
按此訂閱：https://prime.fortuneinsight.com/web/wsj
Subscribe FORTUNE INSIGHT Telegram:
http://bit.ly/2M63TRO
Subscribe FORTUNE INSIGHT YouTube channel:
http://bit.ly/2FgJTen
