雅虎香港財經 FI專欄｜波叔網誌一句 有如當頭捧喝｜千頌C
近日唔少評論，都將香港同新加坡比較，結果陳茂波最新網誌就話，當同新加坡比較時，「毋須妄自菲薄，只須實事求是」，睇完，再加近日幾單新聞，實在有如當頭捧喝！
近年都有唔少報道話，好多公司準備搬總部、搬業務至新加坡，好似美國銀行、花旗銀行、法興銀行、摩根大通。其實，佢哋唔識貨啫，仲有大把人識貨！Bloomberg最新咪話囉，唔少俄企，當中更加包括俄羅斯國企，正積極將業務轉移至香港，甚至更改註冊地，「入籍」成為香港公司！佢哋甚至認為，香港係一個比紐約和倫敦等地「更友好的司法管轄區」！事實就係，香港亦如波叔話齋，「《基本法》保障香港資金自由進出」，只要有香港，俄企多啲嚟，香港密啲手呀！資金想點遊就點遊，想點走就點走！搶企業！Done！
早前皇家加勒比郵輪公司，將海洋光譜號移到新加坡後決定暫時唔返香港，郵輪公司仲寸到趁香港公佈0+3，推package引香港人飛新加坡再上船！沒有郵輪，香港有遊艇，仲要係超級嗰隻！俄羅斯總統普京盟友、鋼鐵寡頭莫爾達紹夫，就俾歐美制裁緊，不過佢隻價值5.2億美金嘅超級遊艇「Nord」，仲可以自由地泊喺香港，我噚日見到佢嘅芳蹤呀，政府仲講明「不會實施其他司法管轄區施加的單方面制裁。」雖然我唔知有咩制裁唔係單方面嘅，不過anyway，事實證明香港維港，仍然係嗰個水深廣闊、三面環山嘅世界首屈一指嘅自由貿易港。連俾人制裁都嚟到，這就是自由。
至於香港唯一紙包飲品回收廠Mil Mill，不獲業主科技園公司續租，面臨迫遷及停運；與此同時公司就得到新加坡羅致去當地發展，港棄坡取咁話。即係咁，邱達根早前就話Mil Mill係簡單嘅回收公司，技術含量不高，係低端科技。科技我唔識呀，不過邱生貴為科技創新界立法會議員，一定好熟悉科技，如果Mil Mill係低端，咁「安心出行」一定好高端！話晒佢講到「0+0」之後，掉咗安心出行就好嘥，所以建議改變「安心出行」的用途，例如可改為「安心book場」，或者用嚟做Treasure Hunt，喺18區派錢、派禮物。回收再造紙包飲品盒呢啲嘢，就由新加坡去做，香港有高端科技應用程式循環再用！呢啲咪真環保！真實事求事！
再講，成日話香港抗疫措施太嚴格，一如《人民日報》所說：「『躺平』沒有出路，堅持就是勝利！」「抗擊疫情，信心比黃金更重要。」香港政府堅持抗疫，實乃為大局為重，錢財身外物，健康才是財富呀。香港真係一片福地呢！最後，節錄波叔篇網誌其中一段作結：
「若我們全面審視客觀環境和因素，便會明白香港實在是充滿機遇、前景亮麗。跟其他國際金融中心比較，香港最大、最核心的優勢，在於我們是國家—全球第二大經濟體—中首屈一指的國際金融中心，並具有難以複製、難以取代的『一國兩制』下超級聯繫人角色，這也是我們籌劃香港長遠發展的根本起點。」
註：本網頁所有專欄作者的觀點，不代表本網立場。
Fortune Insight 聯乘 《華爾街日報》推出全新訂閱計劃「FI Prime Plus」，只需WSJ官網原價三分一價錢，即可同時暢讀《華爾街日報》全網內容和Fortune Insight大部份收費內容
按此訂閱：https://prime.fortuneinsight.com/web/wsj
Subscribe FORTUNE INSIGHT Telegram:
http://bit.ly/2M63TRO
Subscribe FORTUNE INSIGHT YouTube channel:
http://bit.ly/2FgJTen
