FI專欄｜渣男的公共性｜渾水

FI專欄｜渣男的公共性｜渾水

自從我跳咗一個大坑之後，盛蒙各位讀者愛戴，覺得我講得有道理嘅人好多，但也有少量傻仔挑機。

即使一張紙巾一條底褲都有佢本身嘅用處，傻仔是應該當成廢物，循環使用。我習慣喺自己IG story將佢哋貼堂，刷一波點擊率。除此之外，有時研究檢視嗰啲傻仔點解發傻，都會刺激到自己思考。吾日三省吾身。有啲思緒比較混亂，等我慢慢順着個flow去講。

其中一個爭拗點喺公共性。

我覺得人家自己的男女私事，是應該人哋自己解決，我是極端liberal右翼。有啲人會覺得因為挪用咗個招牌，就變得有公共性。在今次這件事上，冇人為公共性這三個字有一個清楚嘅界定。

文人到處留情，本來係稀疏平常之事。淨係講哲學界別，隨手都數到一堆，海德格、羅素、沙特、卡謬……比較大問題嘅係，佢哋唔係普通研究哲學嘅組織，而係娛樂化了自己，將自己變成KOL，跟娛樂圈中人過從甚密。所以，他們不只是文人，也是娛樂圈一份子。

沾上娛樂圈就好似食了興奮劑，佢會幫你帶嚟好多粉絲，但代價係粉絲整體質素會下降，因為大眾多係愚昧。有得有失，慢慢地，他們要背負娛樂圈中人一啲莫名其妙嘅偶像包袱。

喺我眼中，文人食女真係好常見，但娛樂圈中人食女，往往都俾人迫左上新聞。expectation有落差，人設不同，同一件事都可以有唔同效果。米奇老鼠、校長食粉絲不值得關注；但許志安偷食，就是新聞。因為我哋慣咗佢哋各自嘅人設。

失之東隅，收之桑榆，這是將自己娛樂化、商品化嘅代價。所以，喺呢個層面，公共性包括了將自己商品化之後嘅自由市場特性。自此，你要對你嘅觀眾負責，觀眾嘅喜好愛惡係唔講道理，喜好就是喜好，他們不喜歡你食女，你就要接受。這是市場經濟。

我亦想追問一個哲學問題。既然啲人成日批評有用好青年荼毒室個朵，所以有公共性。咁我問你，你點樣證明第三者係鍾意嚴叔本人，定係鍾意好青年荼毒室成員鹽叔呢個身份？中間嘅比例，你點樣去驗證？冇人答到㗎喎，係得條女先知。

如果件事真係有公共性，咁你應該要捉埋條女出嚟一五一十剖白自己所有嘢。但係你哋班室友作為粉絲，係咪真係要去到咁盡先？所謂公共性，根本就係一個大家都冇界定清楚嘅概念。人哋自己男女嘅愛情問題，最好就係由得人哋自己解決，作為隊友更加應該放佢一馬，比空間時間佢哋解決。關我哋外人鬼事咩？

人哋嘅事，要由人哋自己去解決。作為小作家，我都應該有一定覺悟，前車之鑒嘛。當然我做作家都想有人睇我嘅文字，但係我不應該讓主流捆綁我自己。觀眾可以好無情，這幾年好多KOL都因為行差踏錯就永不超生。我做小眾讀者，反而冇咁嘅包袱。

就算有天我玩完，大不了我走去做返一個全職投資者，都搵到食，心無旁鶩分分鐘搵得仲多。將營運自媒體變成興趣，而不是一門生意，講嘢自然大聲啲、自在啲。你可以唔鍾意我，但起碼我係講緊自己相信嘅真說話，而唔係迎合大眾嘅八股文。就算你唔同意我，我講嘢嘅角度一定係有啲刁鑽，同普通人唔同。

以前我認識嘅他們，真係對公共議題有好多參與，我最喜歡的，就是這個時期的他們。但自從幾個月前嘅打針討論，他們退化到一個令人難以置信嘅地步，雞手鴨腳，思路混亂，口出狂言，最後要由鹽叔御駕親征。更加唔使講，佢哋現在已經少咗好多公共議題嘅參與，通常都係玩遊戲，帶貨、唱歌話劇、拍娛樂片、講波……

要走向主流，就不能夠太judgemental，要學識包裝自己，取悅觀眾，慢慢佢哋就喪失了自己的組織性格。即使三番四次幫佢哋補鑊嘅隊友，都要無情割蓆，因為要迎合主流，保住個大餅。我主觀地希望，佢哋唔好放棄鹽叔。我同鹽叔交過手，佢係一個有水平嘅人，亦係佢哋組織嘅中流砥柱。

好男人人設係一個設咒，我無謂揭人傷疤去舉例子，什麼顧家好男人到最後都係GG。好在阿叔我真係寫過一本鹹書，我絕對承認自己係一個銅臭商人同埋渣男。我銀包長期有幾個0.01備用。請大家唔好當我好男人，我係一個經常沉船嘅渣男。身敗名裂不可怕，我怕麻煩，怕出事嘅時候要同傻仔解釋我本身就係一個賤男。

香港也有一些很有質素的KOL，洞察力驚人，例如巴別塔和佬訊。他們用另一種視覺去睇我篇文章，把我放在一個比較高的位置。玉成一事，要深謀遠慮，亦要臨時應變。有句成語叫神來之筆，就係咁解。即使我否認，大概他們都不會相信吧。那麼我就好像撒但先生一樣吧 – 地球就是由我拯救，魔人布勾係我一手KO。

我幾享受嗰種，讓人觸摸唔到，猜不透的感覺。好多朋友識我，但冇乜人講得出我係一個咩人，我點樣搵食，做緊乜嘢……每一個人淨係知道我少部份嘅面向，有很多誤會，我都刻意不澄清，讓自己看起上嚟更加諱莫如深。佬訊覺得我大智若愚，間接幫我build了table image，下次打poker的時候，我就知道應該用什麼章法，打什麼牌。很好，很好。

找天一齊打邊爐。

註：專欄作者的觀點不代表本網立場。

Fortune Insight 聯乘 《華爾街日報》推出全新訂閱計劃「FI Prime Plus」，只需輸入優惠碼「FIP30free」，即可免費一個月暢讀《華爾街日報》全網內容和Fortune Insight大部份收費內容
按此訂閱：https://prime.fortuneinsight.com/web/wsj

Subscribe FORTUNE INSIGHT Telegram: 
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen