雅虎香港財經 KingSir傾樓│用家可積極考慮買樓（葉景強）
上文提到，「有樓之人」如非必要今天不應貿然賣樓。之後有讀者電郵筆者問：「你話賣樓就唔好，但樓價已從高位下跌了不少，咁買樓又如何呢？」其實今天入市與否，就要看你是用家還是投資者。
美股外幣即時報價 多國新聞任睇
如你是用家而工作和收入都穩定的話，是可以積極考慮的。根據中原樓價指數，樓價從去年高位至今已下跌了近17%，即去年買1,000萬的物業，今天只售830萬，加上今天盤多客極少，絕對是「超級買家市」，只要你願意落張票去傾吓，地產代理必定傾盡「洪荒之力」同你砌，而對業主來說，放盤幾個月可能都未收過一張票，更是「久旱逢甘露」，甚麼價都有得傾，隨時在現價再減多十多個巴仙俾你，一來一回即平近三成，上年賣1,000萬的物業，今天只要700萬已買到了。
除了樓價外，用家最希望的是可以買到個心水靚盤，因為層樓隨時會住返十年八載，自己住得舒服最為重要。但在旺市時客多盤少，靚盤就更加少，就算有，一係就賣得很快，上午睇完下午已賣了；一係就好多人爭，業主反價再反價，最終要創新高價才買到。相反，像在今天的超級淡市，靚盤一街都係，可以慢慢揀，揀到啱為止，所以必定可以買到你心目中的Dream House。
另一方面，投資者又如何呢？叫得做投資者，唔多唔少都會有一定的「存貨」，在這形勢還未明朗前，有貨在手的大都不會急於入市。
投資者只吼平靚正貨
現在最應該做的就是將物業加按，如借500萬出來，可以賺取2%現金回贈（即10萬元），之後可將資金分成幾份再存入銀行分三個月、半年及一年做定期，那就可以賺取高利息之餘而又不需鎖死資金，定期利率約為4.8至5.1%，加起來就有近7%，再減去一年的利息成本平均約3.5%，那無驚無險一年就可賺取3.5%淨回報（即$175,000）。
而近日筆者亦眼見部分資金充裕的投資者偷步入市，他們專揀一些質素高，而又願意大幅減價逾兩成的「跳樓貨」，他們認為高質物業在好市時甚少放盤，但現在就周街都係，今天不單買得平還可以買得靚，買到又平又靚的物業，風險自然相對低。
正所謂有危亦有機，部份買家仍非常擔心香港未來還會跟隨美國繼續加息，環球經濟仍不太明朗。另一邊廂，自大陸多個縣市出現示威後，中央再沒有堅持「動態清零」政策，更說Omicron相對以往的病毒殺傷力低很多，相信往後國內防疫政策將越會寬鬆，中港兩地通關復常將指日可待。
葉景強（King Sir）
本欄隔周二刊出
延伸閱讀：
