Market Insight：板塊輪流炒 新經濟股強勢

港股短期內不宜看淡。

港股上周五終於企上29,000點關口收市，雖然市場一早反映咗中美簽署首階段貿易協議嘅利好消息，但個市似乎仲有力再上。皆因中國為咗防範美國喺金融市場開闢新戰線，市傳唔少中概股將回流香港作第二上市，炒熱港股為新股定個好價係應有之義。因此老古以為，短期內都係不宜睇淡。

事實上，恒指近日進入板塊輪動階段，早前升得急嘅內房股湧現獲利盤，藍籌股中國海外（00688）、碧桂園（02007）及華潤置地（01109）都由最近高位下跌3至7%，加上不斷有內房趁高發債、配股集資，須慎防突然散水。弱勢嘅仲有汽車股，除咗比亞迪股份（01211）有消息支持外，其他如吉利汽車（00175）、華晨中國（01114）都未擺脫調整。

阿里美團勢追落後

至於強勢醫藥股，石藥集團（01093）、中國生物製藥（01177）上周五分別升5%及3.5%；公用股中華煤氣（00003）、本地銀行股恒生銀行（00011）及中銀香港（02388）都炒上，料短期內市況仍會在區間上落，唔同板塊輪流炒起，唔想左撲右撲，不如獨撈新經濟股。

君不見阿里巴巴（09988）被主要股東Altaba減持，股價都仲可以喺高位徘徊；另騰訊控股（00700）、美團點評（03690）亦喺高位跌唔落。呢三隻「ATM」係今年投資者股膽之選，遲早再有炒作。走勢上，騰訊由去年十二月低位至今升逾兩成，同期阿里升16%，美團僅升12%；後兩者股價較落後，卻有更大盈利增長空間，同時上方冇蟹貨，輕裝上陣爆發力更強，值得一博。

展望本周，今日將會公布香港失業率，但對港股市況冇乜大影響，皆因港股走勢早已與經濟脫節。雖然周五已經係年三十晚（半日市），但今年香港人真係冇咩過節心情，只能寄望鼠年一切平安。

古勝