【異動尋寶】股市轉折點 留意本週五（魏力）

上週末「習特會」結果對市場有多大利好？股市能否再上？相信是股民最想知的問題。消息不難預測，但市場如何解讀，才是費煞思量。觀乎週一中美股市的反應，明顯係「有理無理炒咗先」。首先，當正「重啟談判」等於「會傾得成」；關稅不加辣就解讀成「日後慢慢會取消餘下關稅」；順理成章，華為限售鬆綁就當成「唔會再搞華為」。

何解忽然樂觀？陰謀論去睇，大戶唔趁好消息盡量推上去，如何順利出貨？過去半年經驗所得，貿談「講數」意味兩國角力，必然一波三折，加上美股又回到歷史高位，港股也逼近29000，高位震盪是遲早的事，家彈食完轉頭可能低一兩千點又買得返，何樂而不為？

「咁7月係翻身定翻艇？」魏力的忠告是：小心樂極生悲，忽然急回。何解？近日股市勁彈，除憧憬重啟貿談外，更大因素是炒放水。截至本週一，利率期貨仍顯示，美聯儲本月底會減息，機會率是100%！無錯，投資者是在賭今個月肯定減息，反映非常睇淡美國以至全球經濟。不過，同日ISM製造業PMI優於預期，如果連本週五（5日）非農就業數據也好於預期（目前預期16萬），本月減息預期隨時大減，美匯轉升、金價、人仔跌；債息反彈，股市回落。比特幣近日走勢逆轉，由14,000美金大插至10,000美元，是純粹急升後調整，抑或屬股市「先行指標」？好快有分曉。

www.facebook.com/2012jason