PayMe 與八達通 如何才能攻破網購市場（石先生）

今個星期，PayMe 宣佈與 HKTVmall 合作，八達通手機 App 畀大家增值至 PayPal，齊齊由食飯夾錢，小額支付向網購靠攏，真係有啲驚喜。不過，大家唔好以為呢兩個舉動可以改變香港小店/小型網店以「ATM 入數」為主要收款方式呢個費時失事嘅現實。

香港嘅小店係利潤有限嘅現實面前，信用卡機、EPS 機嘅租機費及手續費一向都唔係選擇。早輪八達通開通商戶版，能夠用手機收款免租機費已經好幫到手，但八達通有增值限制，顧客卡內一向儲值有限，即使有自動增值最多都係 $500，對於部份網店來講始終都係唔夠用。

對於小店而言，Payme 與過往用開嘅「ATM 入數」其實無咩分別。顧客戶口畀錢直入商戶戶口，即收即時落袋，周轉無煩惱，但用落比 ATM 過數快，唔駛搵櫃員機，唔駛對數，唔駛驚假入數紙。雖然呢類 P2P 付款功能好多 Mobile Payment App 都有，好似八達通嘅 O!ePay、支付寶、微信及 Tag&Go，但用戶入錢快，商戶拿錢快嘅唯有 PayMe，加上免手續費，試問小店店主怎能抗拒。

.

幫 PayMe 做起市場嘅係小商戶，但 PayMe 選擇同 HKTVmall 合作而唔係開商戶版俾小店申請，真係好符合其銀行出品嘅 DNA。你可能會話想合作同 PayMe 傾，但小店店主哪有能力走去匯豐傾合作，即使 PayMe 遲也大發慈悲開放 API 畀大家連接，但小店 IT 能力有限，有心無力。

PayMe、八達通如果真係想做香港人網購嘅支付首選，確實要認真做點研發，與不少小店愛用的網店系統如：WIX、Shopline、Shopify、WooCommerce 等接通，如同 PayPal 與 Stripe 過去一直在默默耕耘一樣，令千千萬萬嘅小店網店可以簡單接通收付款，才能真正攻破香港的網購市場。

作者：石先生（科技博客Stone IP）

===============

財經精選資訊網站「中環街市」 臉書粉絲頁