TVB不如交棒國家隊?
一如預期陳國強退任TVB主席,當初對電視業充滿雄心的殼王都選擇退場,可見TVB這盤生意有幾難做。TVB要救亡,當務之急係尋找新水喉,問政府借錢又係咪一條出路?
按現時社會氣氛,TVB問政府借錢恐怕難度甚高,幸好海洋公園擔任了先鋒,一開聲就拎100億,只要TVB拋出來個數唔過百億,鼠年拿個好意頭88億,加上TVB仲算有錢賺,似乎較海洋公園擴建大計更容易接受。
不過TVB係上市商業機構,問政府借錢方式就要較轉折,可行辦法係參考內地大型民企發行高息債,甚至推出現時最hit的美元債。只要息率夠高,加上TVB知名度及規模,政府就可以用策略投資為由認購,並可以順便吸引海內外機構投資者等,順勢侵埋CCTV入股,國家隊正式進場。
假如不幸地TVB發債後都越做越霉,甚至搞到要違約,亦可以借勢轉危為機。同樣都係學內地民企國企智慧,無錢派息就建議債主債轉股,順便發行新股集資,政府只要落疊再認購,即可以升呢為大股東兼私有化TVB,TVB正式成為政府持股企業,地位可以與港鐵平起平坐。
行到這一步,TVB成為傳媒界港鐵,政府就有責任幫TVB諗計開拓穩定水源。不妨就以港台已獲撥款為理由,TVB要改用另一套資助方式,就係強制要求全港業主「固網」付費訂閱,這筆數就自動加在每季差餉之上,好像日本NHK般唔睇都要課金,成功的話,TVB即使全日只播政府廣告都唔拍蝕住做,政府更可以再進一步把港台與TVB資源整合,咁又可以收回廣播道三幅靚地,賣地所得足以幫補大半當初認購TVB高息債成本。
當然以上純屬「救亡」考慮,關鍵還是未來TVB要另聘什麼高人回來掌舵?本土「親生仔」又有經營眼光的實在少之又少,碩果僅存林文龍又已被友台招攬。
跟TVB台慶大合照排位,站在殼王身邊人選,不外乎阿叻、盛智文與汪阿姐;阿叻雖然笑點十足,但過往營商記錄不夠好,至於近日因海洋公園而重新受注意的盛智文(上圖)雖然並非「親生仔」,但勝在民意可以加分,又甚有機會助TVB到內地開發影城公園相關藍海業務,進軍大灣區吸金,然而如果政府大幅度介入,盛智文又未必會受到重用;反而不計人事問題,慣與政府交手的汪阿姐似乎係穩陣之選,跟余小姐平分天下,一任主席一任CEO,理應可解燃眉之急吧。
===============
精選資訊網站「中環街市」 臉書粉絲頁