【一句到微】「聰明內容」自動升值（嚴啟明）

喺上次Mint網上銀行嘅案例入面，我哋見識過內容營銷嘅驚人威力！但係，現時網路世界內容項目咁多，喺咁激烈嘅競爭下，應該點樣發揮最大嘅營銷效果呢？今期我將會同大家介紹「聰明內容」（Intelligent Content），同各位講解一下市務人員點樣令內容變得「聰明」，優化內容營銷策略！

針對傳播力度

「聰明內容」並唔係提升內容質素嘅策略，而係針對點樣增加內容項目嘅傳播力度，同埋降低管理成本。試想像下，你花咗好多資源，為A媒體嘅受眾創建內容。而面對B媒體，你又要為新受眾群重新創建內容，會晤會太過幾費神失事呢？「聰明內容」就係透過「聰明」嘅特性，令同一個內容項目可以進行跨媒體傳播，減省重新創建內容嘅時間。

我哋睇睇「聰明內容」嘅學術定義。《為企業管理內容》（Managing Enterprise Content）作者Ann Rockley，就將「聰明內容 」定義為：「結構豐富，能夠有意義歸類嘅內容」。

當中，「結構豐富」係指內容清晰整合唔同資訊元素，方便受眾接收訊息。以人物介紹文章為例，當中，一個人所屬嘅機構、職位、經驗、相片同影片等唔同資訊都會有劃分。就好似大家平日作文咁，內容結構層次越多，就越容易被受眾消化。

另外，「有意義歸類」就係指內容同元數據（Metadata）掛勾。簡而言之，就係以關鍵字眼標籤內容項目，亦都係時下流行嘅「Tag」。

網誌關鍵字可延伸受眾

例如，一篇講述XYZ公司股票嘅網誌，就會附帶「財經」、「XYZ公司」、「股票分析」等關鍵字嘅標籤。被標籤後，對XYZ公司有興趣嘅受眾，只要輸入關鍵字就可以好方便咁search到呢篇文章。喺內容管理的層面嚟講，內容標籤化可以有效接觸到目標受眾；對受眾嚟講，內容標籤化降低受眾接受指定資訊嘅難度，資訊就會變得更加個人化。

總而言之，「聰明內容」可以加強內容傳播力度。能夠好好掌握「聰明內容」特質，對中小企嚟講，未嚐唔係另一降低營銷成本嘅方案。家已經有唔少出版同埋媒體機構，都應用咗「聰明內容」策略，由單一傳統媒介，轉向跨渠道內容營銷。

各位聰明嘅讀者，你又準備好活用「聰明內容」，迎接內容營銷大時代未呢？