【一句到微】似人話，才有感染力（嚴啟明）

以下兩個利用內容軟銷的實例，一中一外，讓我們多多學習。

New Balance價值觀營銷

舊年八月，運動品牌New Balance推出咗微電影—《致匠心》（Heart and Hands）。影片入面李宗盛同一個鞋匠，一個整手作結他，一個整製造New Balance運動鞋。兩邊鏡頭不斷交替，背景同時傳嚟李宗盛一段獨白，以音樂人身份講述為人處世嘅道理。喺影片結尾，佢以「專注做點東西，至少對得住光陰歲月，其他的就留給時間去說吧」，歌頌專注工藝、追求完美、「作品就是自己」嘅工匠精神，向工匠致以崇高敬意。

相比市面上主力硬銷產品嘅廣告，呢部影片反而轉向讚揚人性光輝，賦予品牌人性同美好情懷。雖然呢個內容項目受眾互動性唔算顯著，但係當中清晰嘅品牌訊息撼動人心，無可否認係軟銷極佳的案例之一。

呢短短三分半鐘內，New Balance運動鞋產品出鏡時間唔多，反而係李宗盛談論人生做咗故事主線，當中捉住產品線本身精工匠造嘅價值觀，引發受眾對於產品品質嘅要求及工匠精神共鳴，令人留低無限好感。《致匠心》目前已經累計過千萬個點擊，而且仲喺今年三月榮獲2015年中國內容營銷金瞳獎內容營銷特別大獎！

《玻璃門》「笨蛋」專用攻略

2014年，美國知名求職網站《玻璃門》（Glassdoor）同《笨蛋》系列叢書（For Dummies）合作，推出電子書《「笨蛋系列」之怎樣做好雇主品牌》（Employer Branding for Dummies）。呢本書成功由老闆（招聘者）角度出發，解答好多相關問題。搞好這冊書，為《玻璃門》增加了27%的客戶！

兩個例子，一個結論，就是無論何種題材，必要用人性化演譯；咁樣每先會引起共鳴，搞內容無需古靈精怪，踏實地講理念（New Balance例）或解決對象所需（Glassdoor例），也可成功。

嚴啟明（網誌kmyim.com）—Write4U網上創意寫作平台始創人，現為《信報》及《星島日報》撰寫案例專欄。