【勢股吾到】淡市求生術（李家謙）

港股由4月高位大幅回吐近二千點，本周初成交額更迭創今年新低的奀豬400餘億元，以往收聽率高企的電台財經節目遭廣告商cut時段，部分證券行交易大堂靜過圖書館，經紀煲劇睇娛樂網催眠自己。說穿了，就是股市冇景，資金不是沽貨套現就是按兵不動，令向來喺魚缸揾食的專業炒友及「兼職」炒股的打工仔叫苦連天。其實，自2008年金融海嘯以來，港股每年都屬上落市格局，即是在特定的區間上落，去年大時代一度衝上28500點高位純屬非理性亢奮，當一切歸於平淡，每年市淡的日子總會比市旺的日子漫長，惟一年間總有二至三次急速反彈或大爆升，例如恒生指數由今年3月低位18300點急彈至近22000點，只要把握到回報美肥。機會永遠留給有準備的人，面對目前的艱難日子，打工仔和炒友有兩招逆境自強。

 

對有份正職的投資者來說，市旺時「兼職」炒股每分鐘幾十萬上落，瞬即獲利分分鐘遠超月薪，惟市差時就要識得縮。香港經濟下行趨勢已成，裁員減薪隨時殺埋身，以往常在4點後才全力做公司嘢的，係時候全身投入工作博出色表現，除了救贖自己過往偷雞炒股的不忠誠，更重要的是保住份工。當你每月初要供樓，交租，交保險費及者供養父母子女，在在需財時，便會深深感受到有穩定現金流的威力。

 打工仔首務保住份工

雖然暫時放下鑊鏟做實事，惟有空也要緊盯股市情況及個股消息，一旦股市轉旺便可極速適應「兼職」節奏，老套再話呢句「機會係留畀有準備的人」。

 

如果你堅持炒股過日神，或者靠股市揾食的炒友，恭喜晒，因為你有耐性睇呢度，證明你係一隻打不死的蟑螂，日日為港股成交作出貢獻，趕快叫你的證券行免費畀你大利市機報價服務。對你們來說，以戰養戰係最佳的淡市策略，因為一旦完全不理會市況，每每錯失嗅到見底反彈之氣息，無法在低位入貨，例如今年3月中入市，4月底食胡，回報隨時有3至5成。

雖然近年恒生指數變動不大，惟部分股票卻倍升，例如「科技三寶」騰訊(700)，瑞聲(2018)及舜宇(2382)；基金必買的保險股友邦(1299)；石藥(1093)、中國生物製藥(1177)等醫藥股；濠賭股及轉型變身的殼股。目前市況偏淡，基金選股更加謹慎，偏重前景穩定的績優股，在眾多資金追捧下有限的股票下，容易造成強者愈強，「科技三寶」股價迭創新高便是最佳例證。由於市況大上大落，這些基金股有時失驚無神遭人大手質低，尤其早市對價時若遭人大手嘜低，便是機會主義者出手競價撈貨之時，因為當9點半開市後，股價往往很快復常，扑中這些低吸高沽機會，輕鬆賺到差價。當然，競價前需要睇下有冇通告或者壞消息新聞，磨刀不誤砍柴功也。

唔理乜股 賺錢就係好股

除了上述市值逾百億元的大股，近年細價股亦與大盤背馳，完全反地心吸力爆升，例如供股就是另一個炒友的樂園。早兩個月文章提及的雋泰(630)，供股價0.18元，本周二收盤價0.73元，品質(243)供股價0.32元，本周二收報0.64元。誠如前文建議，遠離慣性供股的「供匪」股，小注首次供股及大股東肯包銷的，勝算高之餘往往有驚喜。

 

用人氣爆燈的黎明最新金句「唔理黑咖啡定白咖啡，只要好飲就係好咖排」，套用在細價股或殼股身上最適合，只要入市前控制風險及預定止蝕位，往往回報不遜於大價股。記得數年前，坊間狂吹噓內銀，資源股或航運股，若不肯止蝕離場，慘過畀人打劫。

 

一句到底，市差絕唔係放棄的理據，學劉德華話齋「牌愈爛愈要畀心機打」，有人愛炒大價股貪其穩陣；有人淨係炒細價股取其刺激過癮；也有人鍾情紅籌國企，話晒有阿爺罩住；有高追破頂派或者也有價值撈底派。股市賺錢殊途同歸，危中有機已屢試不爽了。

李家謙
Himson123@gmail.com
筆者為證監會持牌人，未持有上述股票。