【大茶飯】仲拗係咪牛市?算吧啦!(青冰)
如何界定股市進入牛市?指數由低位彈升兩成,可視為技術性牛市。近日,恒指在英國脫歐後節節上升,符合了這個要求,結果市場再度對港股是否再次進入牛市,作出熱烈討論。
青冰對牛市與否,絕對唔上心,甚至乎是冷感,形同一條死魚。點解?因為新常態下,根本唔會再有牛市或者熊市,只有資金市。只要某個板塊夠概念,資金自然會衝入場,哪管牛熊。你睇憑Pokemon Go鹹魚翻生嘅任天堂,唔夠一個月炒高一倍,但日本股市依然係死死下。
俗語有云炒股唔炒市,新常態下這個已是市場共識,只有炒期指嘅高手才會理會指數。恒指上半年跌半成,但中電(002)逆市炒高兩成做大贏家,REITs亦齊齊破頂,證明高息股同環球債市一樣,進入大牛市;不厭其煩再提多次,知道指數牛熊係冇用的,你要贏錢,就要知道哪個板塊進入牛市!
近期派特別息的股特別吃香,華置(127)四日已炒高三成過外。堡獅龍(592)年初賣舖大賺3.3億銀,嚟緊全年業績肯定有盈喜,而家揸住6億銀現金,大股東持股七成,大有機會派特別息,憧憬打孖上,難怪近日已見聰明錢泊岸,分階段買入等收成,贏面有幾高唔使我講啦!