【百萬Blogger】扑傻瓜 (財叔)

近期收到好多私訊，個個第一句都話係我讀者，但一問問題就露晒底，最好笑有個問我騰訊（00700）買唔買得過？我話佢連我寫乜都未知！哈哈！如果真係我讀者，點會唔知我唔會私下答問題呢？

其實我唔私下答問題的原因，係憑三言兩語我唔敢俾任何意見，如果我講完你就去做，一陣衰左就會話我老點，咁你可能話隨便問下我意見，咁咪即係浪費我時間？如果係我讀者，應該知我是希望分享經驗而令人得到啟發，因為投資同投機最緊要都係計自己條數。

400萬車位 跌破眼鏡

好似早前有個屋苑車位開售，物業共358伙，可供出售車位共139個（1：2.5），價格由320萬至400萬元。四房單位佔144個，有優先認購權及50萬優惠，即折扣後為270萬至350萬元。發展商首批推出119個車位予四房單位認購，有朋友跟我打賭，認為必定一Q清袋，佢都諗住買返個自用，但我則認為一定賣唔晒！原因係四房單位業主必定有投資者，是投資者便必定會計數。以300多萬元去買一個車位投資，情願去買一個300萬元的單位，收租約1萬元，相信這些車位月租不會有1萬元吧！而且屋苑旁邊的大廈車位月租也只是3,000元左右！結果如我所料，一Q未能清袋，賣剩約20個車位。

當大家覺得我好似好有料到時候，已經有車位火速摸出，賺20萬！好勁咩？第日再有個賺30萬！一個月後賺過百萬都有！最高車位成交價為410萬元，貴絕港島東！我當然跌到一地眼鏡碎片啦！好在我朋友無聽我講照買，唔係就瀨野啦！

蹺唔怕舊 最緊要受

9月中，發展商再推17個私家車位及15個電單車位，公開俾所有業主參與，我朋友又即刻搵我打賭，話電單車位應該開50萬至70萬元一個，我話無可能，最多唔會超過15萬元，因為電單車位從來都唔值錢，好似貝沙灣都係幾萬蚊一個，仲要賣咗好耐都賣唔晒！結果價單一開，電單車位只是劃一10萬元一個。

但原來真係得我一個睇得咁唔值錢，朋友原本話幫我認購一個，點知附近竟然真係有停車場乘機拆售，電單車位真係開50萬至70萬元一個！我朋友都即刻轉咗話要買來炒返轉，我當然唔會阻人發達啦！不過呢個明顯係「扑傻瓜」遊戲，邊個買咗50萬元一個電單車位，我一定笑佢一世！不過放心，一定有人買，因為一般人都會覺得私家車位400幾萬元，電單車位平咁多好抵喎！又正如住宅賺到幾個錢就發夢一舖養三代，賣完一個又一個，大把水魚等上釣！

我發現真係蹺唔怕舊，最緊要受，只要你睇準香港人怕蝕底心態，首次推少少單位，製造一兩個摸貨成交，之後就唔愁清唔到貨，唔信？得閒留意一下，好多地產商都會分幾期出售，只要第一批賣得晒，第二批加價，人就驚蝕底，唔買下期又可能再加，以為真係早買早享受，遲買又要貴幾舊，賣樓者最想見咪就係「精明消費者」囉！講到發達我真係無機會啦！正一無膽鬼！

 

作者：財叔

擁有20多年投資物業經驗，見證樓市高低起跌，1997年金融風暴、2003年沙氏谷底、2008年金融海嘯，均成功管理風險安然度過，要訣是識得計數。昔日廢青，會考兩科合格，目標明確，如今未足50歲達致財務自由，辭工追夢，助人助學，希望可啟發更多財務自由人，找到心靈富足。本欄所得稿費，全數捐贈慈恩基金會作慈善用途。（本作者文章隔周刊出）