【股壇衝鋒車】聖誕鐘 唔買滙豐買呢隻（周沖）

尚有一個月便到聖誕節，周沖唔係諗到「聖誕鐘買滙豐」的傳統智慧，而係買定東瀛遊(6882)等旅遊旺季，事關東瀛遊集齊3大賣點，喺依家低迷市況下既可成為資金避難所，也有機會成為2016年的強美元大贏家。

2015年迄今，日圓，韓圜及歐元兌美元皆貶值逾15%，當中圓匯更瀉約兩成，主打日本市場的東瀛遊可謂肥過肥仔水，盈利狂升就係最佳例證。截止今年6月底止半年，公司盈利勁升1.6倍至8440萬元，已超過2014年全年的7450萬元，由於外幣在下半年未有起色，預期盈利會保持強勁增長。東瀛遊現市值13億元，預期今年市盈率僅7至8倍，一隻增長嚟講吸引到痹。

東瀛遊第2個賣點係放眼2016年繼續受惠強美元，由於美國極大機會在下月中展開加息，市場普遍預期2016年會加2至3次。放眼全球經濟，獨美國強勢，其餘國家皆無法承受貨幣升值的壓力，即使多年來升值的人民幣亦要靠販值刺激出口救經濟，所以，來年日、韓等東南亞國家貨幣基本會繼續積弱，香港市民出外旅遊勢更多次數，東瀛遊則繼續豬籠入水。

第3個賣點係街貨少易炒上。公司大股東耀騰管理及第二大股東惠理(806)合共持有80.85%股權，加上其他未逾5%權益的基金持貨，相信街貨隨時少於10%，以一隻13億市值兼街貨超疏的績優股嚟講，只要少量資金便能炒起股價。

東瀛遊昨收報2.60元，首站目標暫睇上市高點3元。由於公司極大機會在下月或明年初再發盈喜，所以現價先行上車，等好消息出台才考慮食胡，可能賺返個聖誔新年假期圑費。