雅虎香港財經 【股壇衝鋒車】興科蓉地板價任買（周沖）
大市係24000樓上喘氣，但見到國內資金不像早兩三星期般積極入市，大價股係時候要休息下。半新股方面黎氏企業（02266）一棍升到尾，可見市場資金充裕，不少線人同周沖講呢隻係大茶飯之作，用資金砌高，但呢類空氣股值幾多錢大家都沒法估計，無時間睇的戰友不如水向低流，留意一些已發盈警又係地板價的股份，今日帶比大家的興科蓉醫藥（06833）應該係其中一隻。
興科蓉醫藥（06833）為內地血漿製品第三大供應商，去年三月以下限$0.8上市，上市時公司引入四川惠豐投資發展、光大控股（165）旗下投資公司Prestigious Leader為基礎投資者。剛剛一月份發出盈警，溢利跌左5000萬人仔。你可能問，周沖有冇搞錯？介紹隻盈警股！大家睇真少少，原來盈警係因為供應不足。血白蛋白原來係內地需求好大，大到就算提價都供不應求。一件好貨品唔夠貨賣而令到公司盈警真係好無辜，所以興科蓉醫藥上年十一月用咗3000幾萬收購同業，擴大生產規模。
買股票當然買前景，蘋果每次出新產品股價都會炒一炒，發盈警後股價最低都係見到$0.51，比今日收市價都係差10%到，成交量仲要唔大，證明要止蝕的都沽咗。當基數縮細，供應量大增，下年興科蓉業績應該脫胎換骨，依家市值只有9億幾，仲有2個基礎投資者輸緊三成，條數點計你懂的，上番招股價都講緊4成水位。
買入價：$0.57 目標價：$0.8 止損價：$0.5
周沖
