【專家分析】九倉置業商場交到數因為...
【Now財經台】九龍倉置業(01997)中午公布中期業績,基礎盈利按年升3%,中期收入跌17%,期內海港城商場收入升1%,時代廣場收入跌22%,不過兩個商場出租率升咗,係咪反映緊商場、零售開始恢復正常?
艾德證券期貨聯席董事陳政深指,公司做少咗生意嘅同時,營運支出都少咗,推廣方面支出大減,反映公司有盡力控制成本,不過,香港上半年零售銷售跌2.6%,九倉置業旗下嘅海港城收入有得升,證明盤數唔係淨係慳返嚟。
Ryan又指,與其無了期等自由行刺激本港零售,海港城較積極針對顧客結構去吸引唔同品牌進駐,因此,海港城就算喺零售市道較淡靜嘅情況下都交到數。