【專家分析】港股再見「3‧15」大冧市低位機會微
【Now財經台】美國證交會(SEC)最新將微博(09898)納入「除牌風險名單」,成為第6隻「除牌風險名單」中概股。之前5隻「上榜」中概股股價一度重挫,但過去兩個星期,其中4隻已完全收復失地,其中再鼎醫藥(09688)更升凸30%以上,中概股以至港股後市會點走?
華盛証券分析師聶振邦認為,中概股及港股再受到衝擊嘅機會較細,因為港股正處於業績期,唔少公司嘅業績表現都好過預期,加上現時有盈利基礎嘅中概股,以及中資科技股嘅股價,已回落到近4年至5年低位,因此,近期可以見到仍有資金流入市場,聶Sir估計,中概股或港股回落至3月15日大跌市低位,即18235點嘅逾9年半低位風險較細。