海洋公園接手八鄉暹羅鱷 考慮長期飼養
日前有人報案喺八鄉錦上路發現一隻鱷魚,漁護署捕捉之後,發現係一隻雌性暹羅鱷,相信係經非法入口,宜家由海洋公園負責照顧。 海洋公園動物及保育部主管祝效忠今日話,鱷魚表現活躍,但經過捕捉之後有一定壓力,身上冇明顯外傷,會檢驗血液確認品種。佢又話,暹羅鱷係受保護物種,一般喺養殖環境出現,相信係非法入口,而鱷魚嘅身型都較圓潤,可能有人餵飼,或自行捕食野生動物。 祝效忠話,會制定適合的護理程序,海洋公園有照顧類似鱷魚嘅經驗,會研究館內有冇適當設施,將鱷魚發展成保育項目,考慮長期飼養。