【股市脈搏】北水將港交所「掃」上$500
【Now財經台】港交所(0388)暫時已連升第3日,今朝一度高見510元,升近4%,衝上近4個月高位,但之後企唔穩500元。
據《彭博》報道,內地計劃收緊紅籌及VIE去海外上市嘅監管,甚至可能要獲中證監放行,市場估計,去美國掛牌嘅中資股可能會少咗,反而會選擇嚟香港上市,到時港交所就會受惠,加上6月開始,新股市場明顯升溫,同日會有超過10隻新股齊齊招股,北水近日已狂掃港交所,噚日淨買入4.87億元。
睇返技術走勢,港交所今朝已突破咗近4個月以嚟嘅橫行區頂部,如果未來幾日企得穩,有機會再向上衝。