香港股市 已收市

【胡.說樓市】單身狗置業悲歌

「咁你單身狗人人都歧視架啦,少個人呀嘛......」呢個係單身狗的心聲。上車靠政府資助房屋得唔得?居屋?白居二?對唔住,都唔係針對單身客而設。狗年,睇黎依然唔屬於單身狗的一年,要擺脫命運,怕且都要靠人領養......

政府今次「白居二」(白表居屋第二市場)2,500個名額,講明家庭客跟單身客九一比,意味得10%配額留給單身客,但有幸躋身單身白表客,要成功揀樓都不容易。

因為就算單身客有樓揀,都未必買得起。在樓價高企時期,即使單身客秏盡成副身家上會,以供款佔入息一半推算,頂盡只能負擔475萬,去年1,600宗成交,得1,100伙符合門檻。當中還未剔除樓齡偏舊一批,實情居二成交,部份銀行貸款年期用「30年扣減樓齡」計算。

以上月最平價居屋柴灣「富怡花園」為例,實用431呎大,居二價盛惠380萬,平均每呎8,817元,但偏偏樓齡已是23年,變相銀行有機會只批七年按揭。即使一成首期,月供也要43900元,根本已超出單身客負擔。

唯一不同的,是今次白居二跟新居屋一併推出,要看情況才知對單身客有否著數。單身狗想碰碰運氣,不妨「白居二」、「新居屋」兩邊同時申請,費用一共360元。去到六月攪珠後,才決定是選擇「新居屋」、抑或白居二。