雅虎香港財經 【大茶飯】休戰延續小陽春（青冰）
繼聯儲局局長放鴿之後，市場在周末迎來另一個好消息，習特會之後，中美雙方都同意休戰90天，不再添加對方的關稅，在未來這三個月就繼續協商，務求達到共識，對於被貿易戰困擾了8個月的市場，算係可以鬆返口氣，但究竟係咪雨過天晴，當乜事都冇發生呢？
局長話現時的利率Just below中性利率，咁究竟仲要加幾多次，其實係冇明言的，只係市場見到佢放軟咗聲氣，解讀佢的意思係就到終點了，但現時仍然預計會加多三次嘅，又或者佢都睇到，在近兩個月，股市都曾有相當的調整，尤以科技龍頭為甚，如果再咁口硬，股市再插，到頭來就會影響消費信心，從而令經濟增速放慢，停一停諗一諗都好正路，如果大家唔太善忘，最近八次加息都係鷹吓鴿吓，並不是霸王式加法，到時經濟好勁，咪補返一句far below囉。
3、4月時侵侵話打貿易戰，冇乜人諗到佢係認真的，點知最後落實加關稅，更擺出強硬姿態唔同你傾，現在有90日畀大家抖下，都係好事，大家過一個開心聖誕，唔好影響消費氣氛，尤其美國。但之前的關稅，令國內氣氛急逆轉，耳聞目睹的新聞，中港廠商仍然係話好大鑊，即使話休息90日，廠商都唔相信啲單會返來，實際的影響，應該要在春節後才浮現。
唔知大家有冇留意，過去兩周先後有本地零售股龍頭出業績，無論係合格定好曳，績後都不約而同對下半年(十月至三月)較為悲觀，這段日子有聖誕、新年及農曆年，傳統上是消費旺季，但各管理層在節日都未到時，已經打定輸數，係唔係過慮，聖誕前後大家都留意吓吧。
十一月再次令市場跌眼鏡，在一片看淡聲中恆指單月升6%，按幅度計真係好勁，不過都係因為十月插得深而已，唔少股份都有喘息機會，騰訊(0700)都由低位升了五十蚊，雖然整體成交唔多，但三四線都有炒作，供股配股全購亦都多返，同時間亦有五、六隻IPO招股，有小陽春的味道，延續多一陣應沒問題，但如果戰友在11月都搵唔到食，甚至要損手，咁真係要考慮提早收爐，留待下年再諗計吧。
