雅虎香港財經 
如果你係馬雲 退休有乜計劃
呢幾日大家都係討論緊馬雲退休。最新消息係話，馬雲會於明年生日退休。
如果你係馬生，50幾歲退休後擁有財務自由，袋住幾百億美元，你會點做？對此朋友之間討論非常熱烈，仲話如果係自己，會有以下退休大計：
1.做個「下流老人」
做慣大企業家的馬雲，可以重新「下流」，體驗不同職業的生活；有朋友話，唔少公司大老闆，都話自己退休之後要去揸的士、做便利店，話唔定有一日，你會喺7-11見到馬雲。
2.郵輪退休
有會計師朋友話，住瑞士養老已不能滿足馬雲呢類有錢人，最好係「海上養老」，長居郵輪到世界各地旅行，也方便他退休後，繼續巡迴演講大派金句。
3.隱居山林
商業社會太厭倦，打工仔與老闆都應該累了，有朋友建議，不如馬雲上少林寺隱居。雖然同太極屬不同門派，但集各家之所長，隨時功夫進入化境。
4.做希臘島主
根據privateislandsonline網站，現時希臘有13個小島出售，退休後入住自己開發小島，真係風光如畫。如果馬雲有心報國，配合「一帶一路」，可替祖國先拿下小島，例如其中一個DULICHIUM ISLAND，只售4462萬美元，相當便宜。
5.再創世紀
對馬雲來說，手上仲有7間獨角獸公司，如果一一上市，馬雲隨時可以挑戰世界首富。有朋友分析馬雲，他與其他有錢人唔同嘅地方，就係無「名下物業」，不如退休後返樸歸真搞地產，再創世紀。
不過講到尾，馬雲點會咁易真退休？有經歷嘅你，相信都見盡唔少人，把口講退休，但愈有錢，就愈退而不休。反而無錢打工仔，先會日日想退休呢～～～
===================
19網輕鬆爆料熱線，歡迎舉報老細同事19惡行，立即click入去講畀我哋知啦
