拆解素肉股Beyond Meat爆升之謎
專造素肉的Beyond Meat剛在美國上市,首日股價收報65.75美元,較招股價25美元勁升163%,打破金融海嘯後集資額逾二億美元新股首日升幅紀錄。
如果以本地街市生態看,素肉即係麵筋製造的齋食材,相對萬洲國際的豬肉王國只不過係小生意,Beyond Meat成為美國新股爆升王似乎難以理解。
其實從三個角度入手,你就會明白Beyond Meat能夠爆升的條件。
首先係名人效應,環保係人人都支持的大課題,國際級富豪支持有潛力的環保投資項目,才顯得自己具有大視野、大使命,所以Beyond Meat上市便吸引Bill Gates、麥當勞前CEO、Twitter聯合創辦人押注,另一間標榜生產口感像真度十足素漢堡的Impossible Foods,融資亦獲得Bill Gates及誠哥支持,有國際級名人作後盾,招股時自然更有叫座力。
其次係真肉生產風險越來越高,現時細菌病毒越來越惡、變種越來越快,世界各地豬場、牛場幾乎年年出事。但肉食始終是全球主流飲食習慣,當豬、牛、羊等肉食供應出事時,像真度極高的素食就可以填補市場的肉食缺口,這方面的吸金空間只會越來越大。
最後係素食者持續增加,身處香港可能較難察覺,但外國工作間有一半人係素食者係等閒事,當先進地區素食與肉食比例已達五五波時候,優質素肉盈利力肯定不下於傳統肉食股。
Bill Gates、誠哥都押注的產業肯定有得諗,可惜這類股份通常都較少選擇香港上市,再一次證明真係要跟貼世界潮流,你點可以唔學玩美股呢又?
===============
精選資訊網站「中環街市」 臉書粉絲頁