雅虎香港財經 操盤手札記│息魔殺到怎換馬（割柑人）
意料之內嘅事，會心安；意料之外嘅事，會心慌！講緊美國聯儲局上月議息紀錄，紀錄顯示，委員傾向提早加息，部分更傾向加息後隨即縮表。上周三紀錄公布後，利率期貨顯示，市場預計3月開始加息嘅機會率由六成升至八成；10年期債息由1.65厘抽上1.7厘，上周五更抽上1.8厘嘅兩年高位；美股連跌3日，科技股最傷。市場預咗提早加息，市場驚嘅係提早縮表！
美國聯儲局肩負「雙重使命」（dual mandate），即穩定通脹同充分就業。上周五美國勞工部公布，上月失業率由4.2%降至3.9%，好過預期嘅4.1%，兼係2020年3月疫情高峰以嚟新低，接近2020年2月嘅50年低位3.5%。此外，平均時薪按月增長0.6%，好過預期嘅0.4%，兼係2021年4月以嚟最大增幅。失業率同薪金改善，觸發加息預期升溫。本周中美兩國將會公布通脹數據，中國周三公布CPI同PPI；美國周三、四分別公布CPI同PPI。美國CPI勢將「破7」，聯儲局或會趁勢加快加息縮表。
資金退潮 就知誰在裸泳
若果提早縮表，點解嚇親市場？先睇何謂縮表，所謂縮表，係指縮減資產負債表規模，即聯儲局縮減所持8.76萬億美元嘅美國債券同按揭抵押證券持倉，減持方式包括債券到期唔再續期，或直接喺市場沽貨。同上年11月尾開始縮減每月買債額唔同，縮買債係減少放水，縮表則係由市場抽水。資金退潮，高估值嘅科技股最受衝擊。「股神」畢菲特話齋：「退潮就知誰在裸泳。」
現時利率期貨、美債孳息、美滙，全都指向最快3月首次加息。根據利率期貨，預計第二次加息喺6月，第三次加息喺11月，更有機會加息4次，12月加息機率現已升至四成；預計加幅，每次0.25厘。「息魔」逼近，市場先行殺估值，引發新舊經濟股大換馬，科技股受壓，金融股受捧。誠然，喺加息周期下，銀行息差收入有望改善，但要留意一個變數，就係經濟增長會否減慢，拖累銀行貸款放慢。
另類參考 高股息率指數
要同「息魔」抗衡，除咗換馬加息受惠股，例如銀行股、保險股等，亦可考慮其他高股息嘅收息股。無乜心水嘅話，則可參考恒生高股息率指數，或揀追蹤該指數嘅ETF。該指數係由恒生指數系列中嘅大型股同中型股組成，按淨股息收益率配置，反映喺香港上市嘅高收益證券整體表現。
由於該指數係挑選嚟自9個行業嘅50隻成分股，可降低行業特定風險。此外，該指數要求其成分股至少擁有連續3個財政年度支付現金股息嘅紀錄，而一年間最波動嘅25%證券會喺重新配置中被排除，可避免成分股波動。若有興趣，可留意GX恒生高股息率ETF（3110）；不過，值得注意嘅係，高息ETF未必一定派息，過去5年嚟，該ETF就曾喺2019年無公布派息。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
