雅虎香港財經 操盤手札記│Condom股大跌 揭示懶人經濟（割柑人）
仲有兩星期就過年，上周五港府宣布延長收緊防疫措施至年初三，過年3日假期冇得出外晚餐，市民即時「初四咁嘅樣」。市場又點呢？市場憂慮收緊貨幣政策多過收緊防疫政策！美國上月CPI按月升0.5%、按年升7%，創近40年新高；PPI按月升0.2%、按年升9.7%，則見放緩。不過，聯儲局官員陸續放鷹，10年期債息高企1.792厘，估計下周議息前美股更加波動。
美股、外匯、加密貨幣免費即時報價，自選投資組合獲取相關新聞提示。
港股觀望聯儲局加息縮表的路線圖，資金「懷舊」，加倉舊經濟股，減倉新經濟股。當中，受惠加息嘅銀行股最受捧。追踪美國24間大型銀行嘅KBW銀行股指數，今年10個交易日已累升逾11%；同期，本港恒生金融分類指數亦累升近9%。滙豐（005）連升6日，上周五收54.55元，今年以嚟累升逾16%，其ADR更率先突破55元；不過，14天RSI已升越88，呈嚴重超買，有回調壓力。
避孕套銷量 疫下反跌四成
講返收緊防疫措施，其實唔止香港，喺傳染力極強嘅變種病毒Delta、Omicron相繼蔓延全球下，唔少地方都再重啟封鎖措施。疫情爆發至今兩年，原本市場預計喺各地lockdown下，需求大增嘅物品，除咗口罩、酒精搓手液等衞生防疫用品外，健身單車、跑步機等家用健身器材，甚至避孕套，都會熱賣，居家抗疫都要適度運動保持健康嘛！實情又係咪咁呢？
本月初《日經亞洲》引述全球最大避孕套製造商馬來西亞Karex表示，lockdown反令避孕套需求大減，該公司避孕套銷量過去兩年下跌四成，歸因酒店、性保健中心等關閉，多國政府暫停派發避孕套。Karex佔全球避孕套市場五分之一，係Durex、Ansell等品牌代工。事實上，Karex股價過去一年已累跌47%。至於健身器材，美國Peloton過去一年銷情亦由高位回落六成，股價更累跌79%。
手機App槪念股 今年仍睇好
「Condom股」可以怪少咗地方派condom，但係咪只得呢個原因呢？「Fitness股」又可以怪乜呢？歌仔都有得唱：「可以懶的話不會郁」，運動咯喎，懶得就懶！咁居家抗疫最常做乜呢？上周三市場調查機構App Annie發表報告，疫情令人更依賴手機App，上年用戶每日平均花耗4.8小時，比2019年多三成，當中七成時間用喺社交媒體、相片同影音App；花喺App嘅錢高達1,700億美元，按年增加三成。報告預計，今年更會打破上年多項紀錄。
居家抗疫當然有賴手機App，食飯靠外賣、購物靠速遞，仲有網上娛樂如手機遊戲、煲劇睇戲等，嚟緊過年又可以用App交收利是，總之一機在手，幾懶都生活到！雖然今年投資主題之一係「Reopening」，話晒疫情有迹象趨向流感化，但宅經濟中嘅手機同手機App相關股份就唔會out，皆因懶人經濟已成習慣。港股之中，騰訊（700）業務廣泛，又擁有中國最多用戶嘅社媒App同手遊App，可以睇高一線。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
