【中環打工妹】大時代重臨?你感覺到嗎?(袁莉詩)
大時代,經歷左 2015 年嘅港股大時代,恒指幾時再升穿當年頂峰 28,588 點一直係討論焦點,而恒指也終於不負眾望,輕輕掂一掂呢條線,等大家係呢個升市浪潮中多一個 talking point。
恒指升穿 28,588 點肯定唔少人賺左錢,市場上也都湧現一批唱好嘅評論員,莉詩身邊有朋友話話來緊實破 29,000 ,更有話歐洲問題被大家忘記後仲有得升,話唔駛睇得太淡。升市好,跌市好,大家都沒有水晶球,一樣靠估,有人覺得恒指升穿大時代頂峰係好兆頭,但你行出街又感唔感覺到大時代?
莉詩有位長輩生平不太炒股,對佢來講投資只係保值,有錢賺當然好,但佢話日買夜賣心理壓力太大,都係去釣魚輕鬆下開心啲。這位長輩一路係莉詩嘅經濟指標,因為當佢同莉詩講股市嘅時候,往往就係股市大跌嘅前奏。
回望 2015 年嘅大時代與今天的市況,你看不到有大量散戶開戶口,拿住股票機篤篤篤,無咩人同你講要訓身抽新股,也都無人同你講買中邊隻蚊型股發達,今次嘅升市同過去嘅似乎有啲唔同。
望番恒指嘅成交額,金額不單止無得比,而且未返家鄉嘅股票仲有唔少,好似聯想、中石油、中人塊、中移動、海通證劵及港交所,港交所至今同高位都仲有成三成距離,想佢返家鄉都真係仲有排等。市旺與否好多人睇數字,但莉詩鐘意出街行下多過睇數字,因為你行出街感受到嘅更加真實,能夠被控制嘅因素也都較多。
試問你今日行出街,有幾可見到人歡天喜地,食鮑魚、去遊埠,講緊嘅咪又係食譚仔,搶平價票。真正嘅大時代,或者仲有好長嘅一段路。
簡介:八十後中環打工妹, 英國畢業後回港體驗200呎豪宅獨立生活, 關心Fintech動向, 既愛financial times, 也愛陶傑張小嫻