雅虎香港財經 【大茶飯】企鵝交棒俾小飛象（青冰）
上半年騰訊(0700.HK)撐起四分一的恆指升幅，「王者榮耀」居功至偉，但由於瘋狂地受歡迎，近日已經有內地媒體用鴉片作比喻，雖然誇張，但都有警惕的作用，想不到只係幾日，騰訊率先自我審查，限制未成年玩家每日只可登入2小時，並會陸續加入未成年玩家消費限額，限制佢地非理性消費。
強勢咗大半年的騰訊，似乎終於搵到個藉口回吐，如果開個圖出黎睇，會發現佢半年以來，強到連50天線都未掂過，青冰過往的經驗告之，每次強勢股首次回試50天線，一定要吸納，不過每當機會出現，總會帶住一個好像極壞的消息，到價敢唔敢買，就要考自己的膽量了。
即使這個消息冇出現，青冰都會指出，下半年的重點應放在環球金融股，科網要抖抖喇。上周美國聯儲局自08年海嘯以來，首次批准全部銀行通過壓力測試，多間大銀行隨即宣佈增派息或回購的計劃。由於美銀在6年前危機出現時，向股神巴菲特發行優先股，而只要在2021年前，美銀恢復季度派息至0.44元，咁股神就可以行使認股權，以7.14認購美銀的股份。隨住美銀公佈季息將增至0.48元，早兩日股神亦公佈，兌換7億股股份，成為美銀單一最大股東，美銀現價係24美元，賺幾多自己計吧。
滙控(0005.HK)旗下的美國業務，亦受惠於今次壓力測試PASS，換言之美國分部可以大增派息，咁銀彈充足的大笨象，似乎可以啟動新一輪的回購計劃，上年公佈的25億美元回購，4個月內累積升咗三成，今年2月公佈的第二輪回購只有10億美元，已經即日隊4蚊，花咗四個月時間先上番高位。
美國加息及縮表，令息差擴闊及利率曲線正常化，近期特朗普亦搞緊放鬆銀行在海嘯後的過份監管，全部措施都係有利滙控，所以有理由相信，大笨象下半年可以變小飛象，上星期四單日急升6%，仲配合超過80億成交，如果係純為挾倉，就實在太落本喇，唔好忘記佢仍有5厘半息，買公用股不如博小飛象啦。
