雅虎香港財經 【大茶飯】從旅行細節位看股票（青冰）
長假期後歸來，的確需要點時間去pick up返個市場，旅行可分享的趣事太多，留待在專頁上慢慢講，專欄就談多一點旅行跟股票相關的事。
首先要說的，便是今次乘搭的國泰(0293)，就股價看，跟兩星期前跌了半成，相信是油價升上半年高位所致，青冰早前講過，他們燃油對沖的策略改變，最有利的油價位置，是布蘭特油在65美元左右的水平，現時都只係72蚊，唔算太離譜。至於作為乘客，今次的體驗就較兩年前差了，尤其膳食，不過一分錢一分貨，今次機票係比想像中便宜的。
當地旅遊及機場接送，現時有幾個旅遊app都有提供，香港本土創辦的那個app，在訂活動及某些景點的入場費，比官方網上訂購仲平，不過留意返有啲景點不接受mobile ticket又要指定日子，每次都要酒店幫你print，係冇咁靈活。至於那個在美國上市的內地旅遊app，今次幫襯佢用機場接送，中伏了，揀咗架七人車，在app上係寫Alphard及近似類型，咁青冰都唔會咁天真認為真係會用Alphard的，但最後出現的竟然是一架似貨van的車，唉算啦，幾舊水係呢啲貨色啦，最伏的是，到達酒店後忽然收到司機電話，但在app訂購時，明明留下whatsapp作為聯絡之用，佢竟然打電話來找青冰，接聽後發現她是來找著數，說有些附加費要畀，說自己賺得很微薄，app平台賺盡了，可以的話用微信支付給她，蝕了漫遊費用的青冰自然氣結了，收線後立即向旅遊app投訴，結論同上文一樣，一分錢一分貨。
出遊前上網搵過料，得知用銀聯卡及Visa便宜，不過去到當地，或許青冰消費的地方，不是大路同胞喜愛的餐廳，也不是名牌店及百貨公司，感覺上銀聯唔太通用，而Visa payWave卻很普及，去到一個大型嘉年華(類似AIA的)，買幾條粟米買隻熱狗，都可以payWave，的確係正。
雖然內地企業積極進軍海外市場，但以一個遊客身份仍看到不少細節位的不足，不過都好正常嘅，佢哋一向都是以量取勝，質素放次要嘛。
