香港股市 已收市

【樓市贏家】使盡橫手都係咁 龍床盤賣唔賣得郁?(徐峰)

香港最多人喜歡做的事就是跟風,人做我做,人唔做我都唔做,就連買樓這種人生大事都一樣,市場反應好時,就一窩蜂去買,但開始時市場反應差,之後就更加少人幫襯,不過,香港發展商就好醒目,最懂制造假象,所以當你以收票數字或超額倍數作為你買或不買一個新盤時,最好都要看清楚內情。

例如近期推出的「龍床盤」,其實當初開盤時,筆者都其市場反應都不抱太大期望,始終近月樓市差到一個點,幾乎所有新盤都「撻Q」,再加上兩個發展商,即佳源同波叔太子爺都是賣樓初哥,對賣樓可以說是全無經驗可言,只靠代理從旁提議。

再加上,上手留落一句「龍床」,令到這個最細面積只有128呎的樓盤成為所有傳媒追殺對象,市民對其觀感已非常差,發展商還要以超過兩萬蚊賣一呎開放式單位,所以自從收票以來,反應都極之不濟。

從市場上提供的資訊,大家都知道這個樓盤在上星期四到昨日收約60票,超額一倍多,其實憑這些數字,已知道反應不是太好,但當你再仔細研究,就會知,其實反應係極之差,就連超額倍數都是發展商使橫手強行制造出來的假象。

菁雋一共有356個單位,發展商首張價單跟足一手例指引,推出73伙,即佔項目兩成,但可能因為收票反應實在太差,又或者發展商真是好「惜售」,首份銷售安排只會推出其中27伙,即係佔首張價單約37%,又或者只佔樓盤總數約7.5%,好彩這個盤是在「娥六招」推出前已批出預售文件,所以發展商可以用這一招,減少出售單位的數目,從而推高超額倍數,否則可能到出售當日都未足額。

而另外一招,就是增加每個客人可入票的數目,增加水份票。其實近年大部份樓盤,發展商都只是容許每個客人入兩票,簡單來說,以總票數除二,大約可以知道有多少客人想買,不過呢,菁雋就容許每個客人入三票,即是說,以收到60票計,實際只會約20人想買這個樓盤,不過,聽講今次有幾組客都是一家兩口、三口一同入票,其實就有一家三口合共入了9票想買一個單位,兩口子入6票的都有幾個,即是話,這個盤到最尾很可得都是得十個八個實客。

=============================================

中小型代理行大匯集 Yahoo!搜尋器筍盤最多最齊