【樓市贏家】買晉海使唔使蝕？（徐峰）

新地樓神開盤，個個爭住搶，日出康城晉海一個星期便賣出超過750間，成績相當彪炳，仲有不少名人入市，好似大台姐仔姚子羚，前「補習天王」吳賢德（Arthur Kho）還以2000幾萬連掃兩個大單位，事後仲同傳媒講，今年已買入幾個新盤單位，價值成9000萬元，好威威！不過，有樓神加持，還有名人撐場，是否等如有賺無蝕呢？

睇翻過往資料，樓神賣樓不時都有「補習天王」捧場，例如香港始祖級「補習天王」Ken Sir吳錦倫，一、二手都相當支持新地，可謂忠誠粉絲，買賣多間凱旋門都為他帶來可觀利潤，不過，都有失威的時候。

好似2010年用接近3200萬元購入的上水天巒一幢洋房，早幾年就以3050萬元售出，單是帳面已蝕百幾萬，連同使費，損手接近300萬元。去年Ken Sir又以3600萬元售出鴨脷洲南灣一個單位，連使費實蝕560萬元。

講起南灣，當年在樓神效應下，都有不少名人購買，雖然未至於全部蝕讓，但結局都不太理想，好似「風之后」李麗珊幾姊妹數年前以1808萬元售出的一個1300多呎大單位，雖比購入價約1670萬元賺少少，但計埋使費實賺只有幾十萬，大大跑輸大市。

不過樓神過往賣過的新盤之中，相信是由山頂倚巒創下最大額蝕讓紀錄，這個盤於2006年推出，當年樓市正值升浪，幾乎每售一伙都可創下紀錄，印尼財團 De Monsa於07年以2.4億元摩入一幢洋房，兩年後沽出，成交價僅1.75億元，兩年勁蝕6500萬元。

其實咁講，又不是想針對樓神賣樓，始終他都曾經為唔多粉絲帶來搵錢機會，而且他們賣的樓，質素始終有一定保證，舉返

以前的蝕讓例子，都是想提提大家，有品牌、有名氣，都要懂得揀地區、睇時機，不要盲搶樓。