雅虎香港財經 【異動尋寶】假如美聯儲真的掉頭減息…（魏力）
上周本欄標題：「英國脫歐：Just do it？」竟一語成讖，黑天鵝四圍飛，投資市場下半年睇怕亂過亂世佳人，作為投資者，只能Keep Calm and Carry On。
記得黃子華有個楝篤笑，講到去買基金，顧問都會「好心」提醒，基金價格可升可跌，子華當時抵死回應話：「我淨係想買啲嘢係唔升、唔跌咋喎！」聽落好白痴，買得基金冒咗風險，梗係想佢升啦！但當全球資金將10年期日本國債息率搶到-0.224厘，德國10年期國債息去到-0.116厘，即係代表咩？負利率代表你貼埋錢，將你的錢借畀國家10年，而家陣去買負息債，你只係賭一樣嘢，就係有下家願意用更高價接你火棒，願意貼更多錢去借錢出去。
依家的確係有好多人，願意去冒風險，目的不是為賺錢，而係令自己輸少啲。所以在如此亂世，子華要求的「唔升、唔跌」（即係打和）其實都唔易辦到。
亂世之下，首要是保障自己購買力。英國脫歐公投後，英鎊大貶值創30年新低，兌美元跌到1.3水平；歐元插水3%至1.1；人民幣中間價連創2010年以來新低，美元兌日圓則跌5%至101水平。簡言之，港元兌歐元、英鎊升值了，兌日圓則貶值了，將匯率因素計入股價，港股相對其他股市普遍是貴了，高估值、人民幣資產多，而增長存在不確定性的股份，最易成大戶提款對象，科網股宜開始減持。
另一方面，美國加息無期，甚至在賭會掉頭減息，資金會否將高息股當成國債咁瘋炒？派息比率最高的REITS、工用事業信託近日持續受捧，而兩者之中，筆者更看好不受租金收入影響的工用事業信託，包括香港電訊（6823）及港燈（2638），股息分別達4.8厘及5.6厘。至於較冷門的選擇，不妨留意派息比率87%、最新股息率4.5厘的新意網（8008）。
