雅虎香港財經 笑到最後｜自由行日花100蚊及恒指五萬點（高明）
五一黃金周配合煙火表演，吸引很多來自內地嘅自由行旅客，電視台、其他傳媒訪問每日消費額，普遍受訪者都係唔住酒店即刻來回兼消費100港元以內。
美股外幣即時報價 多國新聞任睇
港人樂見「窮種兵」
呢類旅客本來係香港一般人最想見嘅旅客：嚟香港唔消費，甚至帶埋杯麵嚟，食飯錢都慳返，唔會用經濟影響舖頭組合，成街都係電器舖、藥房同珠寶店，從而影響本地人哋日常生活；窮種兵一般嚟香港都係進行「戀殖之旅」，專去麥當勞道英文街名打卡，唔去廣東道買名牌，去港大加其他英式建築等；最新亦有人選擇行山行麥里浩徑等等。
貴客掃貨 好過睇執笠消息
如果窮種兵喺十幾年前香港最風光時出現，相信會係受到香港人歡迎嘅遊客。因為除咗開藥房同電器舖之外，一般人都唔會受惠自由行，反而只會覺得條街好逼，有小朋友嘅會買唔到奶粉等等。
相反，當時嘅貴客，例如入名店掃清嘅貴客，如果今日先嚟，雖然大部份香港人冇份賺，但氣氛好，好過日日睇執笠消息。
事實上，香港過去唔係靠旅遊業，一般散客幫襯高檔旅遊服務，都只係幫手交租，真正食糊都係靠少數最有錢人。情況有如去茶樓飲茶，都只係幫輕人工舖租，真係賺錢靠酒席一樣。
無論手袋同金銀珠寶點值錢，都唔會買得多過股票。同產品相反，股票越貴越多人買，而且越多人買大家有錢齊齊賺。
恒指過去咗一個月升8.86%，升幅冠絕全球，以星期四收市18207點計，相同升幅只要連續維持多12個月，將會係50426點。
只要恒指持續升到5萬點，啲自由行嚟使100蚊定1萬蚊一日根本唔重要。呢一日出現只係時間問題，所以香港真係一塊福地。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
