【異動尋寶】港股主旋律 你聽見嗎？（魏力）

聽得出目前港股的「主旋律」嗎？就是向高估值股份say no。科技股（如落難中的騰訊(700)）、教育股、物管股，30幾40倍PE的公司，全線掟貨。特別是後兩者，當炒變當災，沽盤同運氣一樣，話嚟就嚟。

聽得出目前港股的「主旋律」嗎？就是向高估值股份say no。科技股（如落難中的騰訊(700)）、教育股、物管股，30幾40倍PE的公司，全線掟貨。特別是後兩者，當炒變當災，沽盤同運氣一樣，話嚟就嚟。

「唔係話教育、物管股高增長、輕資產、現金流勁，又不受貿易戰影響？」全對，但當升幅拋離其他板塊九條街，總會有人想用股票換番錢。點解？舉個例：有三款蔬菜，質素唔同，價錢自然唔同，好合理。一年前，A賣10蚊斤、B賣15蚊斤、C賣20蚊斤。

同樣是一年前，個市好景，人人搵到食，自然想食好啲，食有機菜（即係C）。A雖然係平，但睇落唔新鮮，間中仲見到爛葉，自然平都無人吼，個價就跌落去。一年過後，供求關係之下，A跌到4蚊斤、B賣12蚊，C賣32蚊。

本來一年前，1斤C的價錢，可以買2斤A，但家陣變成買1斤C，可以買8斤A！適逢個市逆轉，跌咗半年，輸到阿媽唔認得，褲都就快穿窿，唯有節衣縮食，拎4蚊買斤A就算，無論C幾靚、幾好食，都食唔起了。收水退潮市之下，市場資金少咗一截，再加上個市段段跌，財富蒸發又唔見一截，高PE股票也難逃地深吸力了。

執筆時，澳門公佈7月賭收按年增長10.3%，至253.27億澳門元，略低於預期。不過，魏力更關注的是累計毛收入的按年變動，今年來已呈現逐級下滑的趨勢，由1月份的按年增長36.4%，降至4月的22.2%，至7月份進一步收窄至17.5%，反映濠賭業增速在放緩，而博彩業作為內地消費升級的主要受惠者，自然也會受累於大陸銀根緊絀、債務危機問題日益擴大。

以龍頭銀娛（027）、金沙（1928）計，預測市盈率分別為21.8及20.3倍。剛公佈完中期業績的澳博（880），預測PE更達23.7倍，適逢進入行業增長放緩的階段，會否成為「下一個C」？不妨留意。

筆者為證監會持牌人，未持有上述股份權益。
www.facebook.com/2012jason