【銀行小妹甩轆記】情人節 花落誰家 (溫柔)
每年情人節,花香處處。不過,喺分行,各位女同事對收花都無咩期望。
但係!今次情人節中午時分,突然,有人送花上門!所有女同事即刻有意無意望過去,等待送花員開口。
「請問邊位係……」保安昌哥幫手收花,八卦嘅小妹第一時間衝過去,睇吓究竟係邊位得獎者。
「一定係娜姐啦!」昌哥搖搖頭。
「咁啊,Connie姐?」佢繼續搖頭,加個詭異笑容。
「唔通係Ernest?」「唔啱。」
唔通……唔通真係我?!天啊!我完全無心理準備!雖然我都知應該有好多人暗戀我、仰慕我,但估唔到揀今日比驚喜我!唔知係邊個送嘅呢?同事?唔通係楊生?哎唷,真係醜死怪,希望啲阿姐唔好妒忌啦!但束花擺係邊好呢?擺枱面又唔得喎,一係擺喺我後面張枱啦,畀人睇到得嚟又唔會太張揚,嘻嘻,一於咁話!
我含含蓄蓄地伸手去接束花,個樣扮到完全不在乎,點知,昌哥話:「啱啦,你幫我攞去比Helen啦!」
咩話?Helen?嗰個嚟咗唔夠兩星期嘅Teller妹妹?!
佢明明無男朋友㗎!究竟係邊個咁快手? 嗰種震撼,嗰種愕然,係你想像唔到嘅。
妹仔收花 隨時俾人蝦
Helen收花,連佢自己都好驚訝,但由於Teller枱面不能擺個人物品,最後紮花放咗喺佢個位後面張枱度,礙眼到每個客人排隊都會見到。
到了下午,分行無咩客人。大家都好八卦,圍住Helen束花,因為喺分行真係無咩人收過花。
束花上面有張卡仔,我哋靜靜雞問Helen:「喂,束花邊個送比你㗎?」Helen個樣好迷惘,佢搖搖頭,表示全無頭緒。
「咁張卡上面寫咗啲咩?」佢打開比大家睇:「一個喜歡妳的人上。」
我一睇,立即知道係邊個,因為只有一個人會寫「女」字邊嘅「妳」字——Benson。
自從我同Benson關係決裂之後,大家都面阻阻無溝通。原來佢已經有新目標,就係新嚟嘅Helen,佢又展開佢嘅捕獵作戰計劃。
上次食飯聽Helen講,Benson有時收工會話「順路」車埋佢,而明明Helen住屯門,Benson住牛頭角。以為出動到溝女工具,口靚妹就會落疊?好彩,Helen講樣唔講金,婉拒。
今次情人節送花,究竟Benson會唔會成功打動芳心?其實唔重要。最重要係兩位阿姐全日燶口燶面,佢咁樣做壞規矩,相信成個2月都唔會好過,而最可憐係懵然不知嘅Helen有可能會被遷怒咋!
作者:溫柔
一個90後銀行跑數妹,分享每日於分行上演的奇趣事,著有《銀行小妹甩轆記》。(本欄隔周刊出)