【魚樂無窮】新股遊戲暫告一段落(唐牛)
噚日在友報發表專欄,指股市出現幾個不祥訊號,結果惹來廣泛討論,正反意見兩極程度,絕不下於現時社會氣氛,綜合所有反對原因,大致都係散戶參與程度依然低、散戶今年冇錢贏、未有少年股神出現、升幅只集中某幾隻股份、細價股仲未炒等等。
對於上述反對意見,我係100%認同嘅,雖然股市氣氛比年初熱烈,但明顯未足以引爆全面性的股災,所以專欄亦指在調配倉位上,只將非核心持股沽走,然後押抽注在強勢股身上,繼續做市場上僅有的贏家,直至最後一刻。至於我會買乜股,請繼續追蹤本欄及fb專頁。
「搭地鐵,隔籬阿姐講緊電話話新股有得玩。」這是朋友昨日早上whatsapp給我的見聞,我當堂嚇一跳,然後得啖笑,連牛頭角順嫂都有錢贏,新股遊戲肯定係尾聲中的尾聲了。事實上,熱爆新股首日表現明顯越來越差,由閱文(772)最多升一倍,到雷蛇(1337)埋單只得18%,再到易鑫(2858)一成都唔夠,在在反映散戶參與度越來越高,分薄利潤,還未計其他暗地破底嘅二三線新股。你話成手貨點算好?我只可以話,新股上市只炒供求,穿底嘅一定要止蝕,賬面有利潤嘅,覺得賺夠就走。邊隻最值得長揸,從昨日的股價表現睇,一定係騰訊親生仔閱文了!
個股方面,保發集團(3326)年初投得佛山倫教鎮工業地,並已更改用途,將打造成綜合全面工業園,為期三年分三期開發,預計將引入不少於100家珠寶首飾及相企業,與當地政府欲打造該鎮成中國珠寶名鎮不謀而合。股價近日逆市呈強,只要守住6.5元支持位,有望再上層樓。
唐牛fb專頁
www.fb.com/tongcow88