傳做正印無望 Mandy Lieu與洗米華分手獲3億掟煲費

Mandy Lieu

太陽娛樂老闆洗米華（周焯華）嘅感情生活一向都精彩過連續劇。自從2015年洗米華同Mandy Lieu世紀一拖之後，Mandy極速為佢生咗三個小朋友。正印老婆陳慧玲（Heidi）更回應傳媒指與洗米華正辦理離婚。當大家都以為洗米華個心塵埃落定後，原來佢從來無放低過洗米嫂，每次出席活動都非常恩愛。前幾日仲一家人齊齊整整幫Heidi慶祝39歲生日。「洗米仔」周柏豪上載一家人嘅合照，其中一張係爸爸錫媽媽，唔通二人已經復合？

「洗米仔」周柏豪's IG

今日就有報道指Mandy同洗米華嘅5年情早前已經玩完，仲話Mandy一直以為自己可以坐正取代Heidi，點知一等等咗五年，而洗米華根本無心同Heidi離婚，仲積極箍煲，二人因此成日嘈交。到最後洗米華越來越少去探Mandy，喺今年年初Mandy仲同洗米華攤牌，話要合法妻子嘅名份，不過男方就拒絕，之後佢哋就分手。該報道仲指雖然話分手，但Mandy都收咗3億分手費，包括英國名下5間公司分別涉及時裝、設計、美髮及其他美容服務，還有食品或煙草零售行業。再加上高級豪宅，都確保Mandy可以豐衣足食，報道指二人分手後仲係朋友，洗米華亦會負責小朋友嘅養育責任。