優之良品退場 係因為有鋪收租?
優之良品結業,唔少人反應係佩服這個品牌可以捱到2022年才宣告退場。從優之良品退場前一些處理物業的動作,某程度都可以解釋到這個品牌的韌力,以及最終決心棄守零售的因由。
放租現金流更強
優之良品宣告結業前,在商鋪市場忽然有大動作,就係將銅鑼灣利園山道39號至47號寶富大廈地下G鋪,面積約800平方呎,設有獨立洗手間大鋪出租。據報這個位處黃金地段的地鋪,是優之良品在2007年斥資7500萬購入自用,原本有意以月租15萬元租出,最後減租至13萬成功租出。
除了出租自用多年的旗艦鋪,市場消息指優之良品亦將觀塘物華街千呎巨鋪,以意向價16.8萬月租放租中,另外之前自用的荃灣街市街及佐敦彌敦道鋪位,亦透過多間代理放租。
假如另外三間自用鋪都順利租出,再加上集團位於葵涌的優之良品中心工廈放租予用家作貨倉或寫字樓,每月就有望從租金獲得過百萬現金流。
以往自由行來港掃貨,優之良品可能一個星期都唔止賺過百萬元金流,但疫情下失去自由行,旗下各分店一片寧靜,與其繼續燒錢,倒不如乾脆選擇退場,將自用鋪出租「躺平」賺錢。
優之良品手握四間自用鋪,亦解釋這個品牌可以捱到今年才選擇結業。經歷兩年疫情,唔少靠租鋪的餐飲、零售企業都捱唔住結業。優之良品繼續撐下去,除了係以往山大斬埋落雨柴,有幾個鋪唔使交租都係關鍵。
值得留意係優之良品負責人向傳媒透露,唔排除會因應日後市況,恢復營運零食生意。咁有信心可以按市況恢復營運,關鍵條件相信都係手握四間自用鋪,當自由行重來,即可以賠租收鋪捲土重來。當這四間鋪重拾聲勢,再慢慢擴充分店網誌都未遲。從優之良品可攻可守經驗,即使近年唔興購置自用鋪,有實力的零售企業都不妨考慮趁鋪價平選擇多,買一、兩個旗艦鋪作為磚頭投資,增加零售生意的韌力。