雅虎香港財經 嘈老闆IG｜乜嘢先係中外文化交流｜曹參國
香港成日講要搞中外文化交流，其實交流呢家嘢最好就係自發，政府太大力搞有時候會適得其反。西九文化區M+博物館最近搞咗個草間彌生特別展覽，嚟緊半年都會喺香港展出佢嘅最優秀作品，我曹老闆就有機會喺開幕禮嗰日晚上去一睹藝術品嘅風采。
草間彌生係日本嘅當代藝術家，但其實佢成名係喺紐約活躍嘅時候，佢曾經同當代其他藝術家好似安迪．沃荷、克拉斯．奧爾登堡、賈斯培．瓊斯一齊聯展，咁就當然升級到世界級數嘅藝術家啦，如果佢由始至終都係喺日本東京就未必有呢個地位。所以如果淨係靠香港係好難出一個草間彌生咁有知名度嘅藝術家，藝術家係要飛來飛去先至會越做越好。
睇返M+個展覽，草間彌生出名嘅波波點可以話係貫穿全場，由平面畫作，到立體雕塑和影像創作全部都見到佢波波點嘅signature，尤其大家去到一定要去地庫二層特別炮製嘅波波點鏡房，工作人員排隊嘅時候都會提你開定手機，每人入到去都只能夠停留30秒打卡，但係就真係有一種同波波點融為一體嘅感覺。鍾意買藝術品feel嘅朋友，當然唔能夠錯過展覽售賣部獨家推出嘅各種產品。
好似主題公園唔好以為入場費好貴，其實佢哋最賺錢嘅係飲食同埋售賣紀念品，博物館要自負盈虧，香港喺呢方面都唔算做得好進取，可能第日西九嘅博物館就要做啲典範出嚟。我曹老闆去過希臘巴特龍神殿博物館，最多人排隊嘅就係佢哋嘅紀念品部，個個都滿載而歸。嗰陣時啱啱講希臘係歐豬四國就快國家破產，我都買咗件有希臘國旗嘅T恤支持一下。
去完博物館，有老外朋友約咗去中環古蹟外國記者會飲啤酒，唔好以為班外國記者淨係識得食西餐，呢個會所出嘅中菜都好出名，仲會不時推出季節餐牌。嗰晚去到竟然有合時羊腩煲，喺外國記者會嘅大堂餐廳嘆住手工啤酒，個啤酒名仲要好自嘲咁用「鬼佬」，夾埋啲柔軟有香味嘅羊腩，呢啲咪叫做中西文化交流囉，世界上唔係好多地方好似香港咁可以將中西文化融合到出神入化。
聽老外朋友講外國記者會嘅續約都未有頭緒，而家嘅主席本身係喺彭博新聞嘅高層，佢開親會員大會都不時俾人質詢，但原來內部文件透露每次續約都係12月底先知道，所以佢哋班鬼佬會員都未完全絕望，仲希望特區政府為咗繼續保留中西文化嘅特色，等外國記者會可以繼續運作落去。
密切留意BossMind動向！立即CLS
Powered by Mercury
