雅虎香港財經 嘈老闆IG｜英國係唔會真係向左走｜曹參國
呢排無論係國際新聞定係選舉報道，都係喺度講緊唔同國家嘅選舉之後，左派定右派上台？其實左派右派，喺好多唔同嘅時代都有唔同嘅定義，而家都有時睇到人一頭霧水。不過最簡單嘅分類就係左派係傾向社會主義，主張通過政府行為財富分配，右派就較為傾向資本主義，鼓勵創業創新同埋個人靠自己努力奮鬥。最近英國工黨上台執政，結束保守黨14年嘅管治，係好好嘅例子講吓工黨而家仲係咪屬於左派？
無論係亞當史密斯嘅無形之手，定係老子嘅無為而無不為，就係講緊政府或者以前啲皇帝，唔好搞呢樣搞嗰樣，俾啲人民自己去搵自己嘅生活幸福。英國嘅保守黨可以話係將呢一個精神發揮到淋漓盡致。最精彩嘅當然係鐵娘子戴卓爾夫人執政時候嘅保守黨，因為佢嘅政見強調個人要為自己負責任，竟然夠膽取消英國小學生嘅牛奶津貼，話呢個係家長自己嘅責任。
喺戴卓爾夫人執政嘅時候，有煤礦工會搞全國罷工，當然背後當時嘅工黨都喺度撐場。咁係就快冬天嚟嘅之前，戴卓爾夫人竟然可以去咗德國簽署購買煤炭嘅協議，完全唔會同工會妥協，反而最後罷運動就停止咗。
後來工黨都上過台，最出名嘅首相貝理亞都唔係完全否定晒戴卓爾夫人嗰一套，佢寫咗一本叫做第三條路嘅書，就係話要排除向左同向右嘅兩極分化，當年可以話係喺大學裏面人人都想讀嘅書。好多人仲以為真係可以行出一條第三條路，不過歷史又證明咗始終都係向左行一陣又向右行一陣。
咁而家做咗英國首相嘅工黨黨魁施紀賢，又係咪真係用返以前左派嗰套理論嚟吸選票呢？其實今次佢哋贏到咁盡，都係因為保守黨真係做到令人失望，其他唔支持保守黨路線嘅中小型政黨喺國會都有進帳，所以呢次選舉係對保守黨執政嘅不信任選舉。
講返施紀賢，佢其實係大幅修正咗上一手工黨黨魁嘅論述，盡量將政策立場拉返去中間。好似佢對脫歐本來好有保留，仲曾經倡議過第二次公投，但係今次選舉嘅時候就為咗要吸納埋唔鍾意歐洲嘅選票，冇乜點講。
佢喺選舉辯論嘅口號係經常掛喺口邊”Fully funded, fully costed “，承諾增加6,500名老師，啲開支就喺私立學校嗰度收返增值稅，仲有取消私立學校嘅一啲地稅優惠。改善英國出名差嘅公共醫療服務，就承諾每星期增加四萬個預約名額，咁啲成本就話可以喺打擊避稅度攞返返嚟。其實聽落呢啲措施都唔係傳統左派咁激進，都係解決緊當地嘅問題，至於俾人收多咗稅嘅人係咪覺得公道，可能就要等另一次鐘擺效應先至會見到。
另一個算係比較激進嘅政綱係成立公營嘅能源公司，話可以降低因為通貨膨脹而貴到嚇死人嘅英國能源賬單。但係工黨上台又點會阻工會運作，公營嘅能源公司係咪真係更有效益？其實世界上已經有無數嘅實際經驗，你睇香港電力公司幾成功就知道靠市場運作，比靠政府官僚，贏唔知幾多個馬鼻。
曹參國
註：專欄作家言論不代表本網立場
