雅虎香港財經 
外國調查：82%打工仔將同事歸類為「朋友」
究竟職場有無友情存在？最近有外國調查指出，82%受訪打工仔女話，會將工作夥伴歸類為「朋友」；惟當中僅得29%稱有視一啲同事為「好朋友」。
Olivet Nazarene University調查了3000名美國全職打工仔女，結果發現，76%滿意自己擁有嘅朋友數目，另有20%認為「唔足夠」，僅有4%覺得「太多」。
數據顯示，打工仔女喺辦公室嘅平均朋友數目，會按年資而遞增。Entry-Level為5人，Mid-Level及Senior-Level分別為6和7人。做得愈長時間，愈多朋友也好正常。但有趣嘅係，據調查指，40歲或以上嘅中年打工仔女，最想喺工作上結交更多朋友。
講到識朋友最快嘅行業，就有保險、市場營銷、廣告、公關、零售及地產，均屬Social能力高嘅行業，一啲都唔意外；相反識朋友最慢嘅，如工程、健康護理、HR、金融、銀行、政府等均榜上有名。
調查續指，30%受訪打工仔女稱「幾週之內」，便可和共事嘅人成為「朋友」；較為慢熱嘅人都唔少，稱要「6個月或以上」嘅佔27%，「幾個月後」也佔22%；而親和力超強，聲稱「幾日之內」就能成嘅，亦佔21%。
至於會跟同事傾邊啲敏感話題，有64%稱「同事間衝突」，而58%會聊「愛情生活」，另有53%會傾「保健」話題，33%則談有關「金錢」問題。
其實，喺職場呢個無止境嘅地獄中，如果身邊有個可以同仇敵慨嘅同伴，互相安慰和支持，咁返工個人會無咁灰，捱世界都捱得輕鬆啲。
===================
19網輕鬆爆料熱線，歡迎舉報老細同事19惡行，立即click入去講畀我哋知啦
