雅虎香港財經 【大茶飯】復星系內的Thomas Cook交易（青冰）
英國百年老店旅行社Thomas Cook正式申請清盤，復星也是受害人之一。早前復星國際(0656)分拆復宏漢霖(2696)上市，戰友問玩唔玩得過，青冰指復星系IPO上市後例跌，不宜沾手，或者大家今次睇完系內Thomas Cook的股權交易，戰友下次唔會再問了。
復星國際於2015年3月斥資9185萬英鎊，購入7313萬股Thomas Cook，作價係125.59便士，佔當時5%股本，以當日匯價計，這筆投資約10.6億港元。復星素有上海和黃之稱，意思係好似以前誠哥的和黃咁，百足咁多爪，主要投資係銀行、保險、地產及健康產業，而Thomas Cook，在當日便歸納在「快樂生活」版塊，內裡有旅遊相關及影視行業。而復星都知自己太多投資，每年的業績內，都有列出主要投資，甚至有十大重倉持股。
自從2015年入股後，復星國際都多番增持Thomas Cook，但就再沒披露入貨價，反正都係在市場購入，銀碼唔大，無必要申報，股東要關心這個投資，只能在中期報告及年報中，睇到持有Thomas Cook的股權百分比，從而推測買入價。青冰睇過最近幾年的年報，2016年中期業績，持有8.45%股權，股價約60便士，換言之已較入貨價跌了一半，2016年年報時持有9.98%，當時有反彈呀，去到87便士，至2017年底，已有11.22%，今次勁喇，股價重上120便士，直頭家鄉在望。Thomas Cook的股價在2018年5月見頂，高見150便士，之後便江河日下，留意返6月底時股價是108便士，12月底時已跌至30便士。
復星國際在2018年7月4日，建議分拆復星旅文(1992)上市，而上市日期是12月14日，青冰記得當日都有想過認購，因為復星旅文以ClubMed作招牌嘛，但最後因市況打消念頭，坦白說當天都冇刨過上市文件。現時翻查文件，就見到有趣之處，原來在6月29日，復星旅文向復星國際購入Thomas Cook的5.37%股權，約8254萬股，對價是8956萬英鎊，按當時的匯價計，折合9.2億港元。心水清的戰友，睇返6月底及12月底的股價，不得不讚復星國際靚沽，半年跌了七成，2015年用10.6億買5%，4年後以9.2億沽出5.37%，細數目唔詳細計喇，雖然蝕錢，但都叫做止蝕得靚啦，只係接貨者是復星旅文的股東而已。
復星旅文以15.60元上市，今年5月見過18.34元，現價是10.40元。按佢的中期報告，佢哋在今年上半年，再增持了4.68%股份，低價溝一溝，已經揸到11.38%，早兩個月仲話會幫Thomas Cook重組，至9月終於被申請清盤。近日見到復星系及大行，都認為此投資對財務影響不大，青冰都是同意的，因為都跌咗九成啦，仲點會有影響，而在復星國際最新的中期報告內，已經搵唔到Thomas Cook二字，提都唔提，仲點會有影響喎。
