雅虎香港財經 太唔是何｜信用卡驗證碼 可以隨便俾人嘅咩？｜400歲人瑞
顧「題」思義，今日400歲人瑞想講一個關於信用卡的故事。同上兩篇（《回贈 APP JamDoughnut 都會計錯數！》及《在英國銀行提款 有意想不到的結果！》）一樣，都係令400歲人瑞腦洞大開嘅經歷。
話說某日，400歲人瑞屋企忽然全屋停電，幾經查察，發現原來係維繫家庭和諧的主要工具——洗碗碟機——出現問題，使用期間啲水會滲咗去電路板引發短路繼而令總電掣跳掣。好啦！咁就打電話問下包租婆點算啦。包租婆就講咗一間公司名（我哋就叫佢公司P啦）俾400歲人瑞知，叫400歲人瑞自己聯絡呢間公司叫佢上門檢查及維修，搞掂就俾張單俾包租婆俾返錢400歲人瑞。
咁400歲人瑞就自己Google下間公司P，在網上預約好日期時間，講低係咩事。咁從個網站嚟睇，公司P都幾歷史悠久又幾有規模嘅，專門檢查維修各種家電、通渠、家居裝修、修補執漏，乜都有做。400歲人瑞嗰日大約喺朝早8點鐘上網預約嘅，唔駛10分鐘就即刻打嚟，同我確定發生咩事，同埋日期時間，仲有就係最重要嘅步驟——俾錢。
客服：咁總數係£144，先生您有信用卡或扣帳卡嗎？
人瑞：有呀，而家俾錢？
客服：係呀，麻煩您俾個16位卡號俾我
人瑞：哦？！我張係信用卡嚟，卡號係嘟嘟嘟嘟、嘟嘟嘟嘟、嘟嘟嘟嘟、嘟嘟嘟嘟
客服：到期日係？
人瑞：嘟嘟嘟嘟年嘟嘟月
客服：個三個位嘅驗證碼係？
人瑞：咩驗證碼？
客服：喺張卡個簽名位旁邊三個位嘅數字呢⋯⋯
人瑞：嗰個號碼都要俾？乜嗰個號碼唔係唔俾得人嘅咩？其實呢⋯⋯你哋有冇網上付款平台？我可唔可以喺你個網站度付款？⋯⋯
400歲人瑞呢一刻忽然打醒十二分精神，呢個三位數字，從來沒有「真人」問過400歲人瑞，每次都係網上購物才會用上，十足十一個密碼咁。電話嘅另一邊而家問我攞呢個「冧巴」，佢會唔會係騙徒嚟嘅呢？俾佢套晒信用卡啲資料，佢咪可以上網任碌我張卡？點算呀？一陣400歲人瑞損失巨款，唔單只會欠下巨額卡數，仲會影響埋「信用評分」，影響「信用評分」，想買樓嘅話就做唔到按揭，做唔到按揭嘅話，就分分鐘買唔到樓⋯⋯
客服：先生，您唔俾嗰號碼我，我幫唔到您落柯打㗎
人瑞：你間公司，信唔信得過㗎？！（問呢條問題其實都幾搞笑）
客服：（呢個時候開啟咗錄音機模式）我哋公司P歷史悠久，擁有超過40年營運經驗⋯⋯（佢將網站「關於公司P」嗰個網頁朗讀出嚟，我知道因為我有睇過）
人瑞：好啦好啦！我俾你喇，嗰個驗證碼係嘟嘟嘟
客服：好！搞掂！先生我已經幫您過咗數，個柯打亦確定好，仲有乜嘢可以幫到您
就係咁，為咗快啲搞掂件事，喺個心好唔安落之下，將信用卡資料交晒俾電話嘅另一邊，對方亦好快傳送咗個電郵嚟，證明已扣咗錢。咁師傅亦喺預定時間到咗，修理好。400歲人瑞亦拎住張發票問包租婆攞返錢⋯⋯一切都好似相安無事⋯⋯至少過咗半年都未見有異樣⋯⋯
400歲人瑞後來問過其他在英國嘅香港朋友，原來佢哋都有相同嘅經歷，大家都覺得好愕然，明明成日話要收好自己嘅銀行密碼嗰啲，點解喺呢啲情況又要曝露出嚟？究竟係打破咗我哋以為嘅「理所當然」、定其實400人瑞墮入咗一個處心積慮嘅「騙案」？
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
留言、給讚、追蹤、分享，請往Facebook專頁：https://www.facebook.com/thames400
