雅虎香港財經 太唔是何｜在英國銀行提款 有意想不到的結果！｜400歲人瑞
上回講到在英國生活，有時啲嘢並唔係理所當然，好似你以為「電腦」唔會計錯數，但原來簡單減數都會計錯。今日就同大家分享兩個喺英國嘅銀行攞現金嘅經驗，兩個都令400歲人瑞腦洞大開：乜原來咁都得？
喺香港攞現金，無論係港紙或外幣，我諗大家都有個共識，就係去分行簽名（甚至對身分證）或者用櫃員機撳密碼撳啲現金出嚟。喺分行提款攞現金，櫃員係會喺你面前表演數錢（又或者交由數銀紙機數俾你睇）。400歲人瑞有幸曾經喺香港做過兼職櫃員，知道呢個「數銀紙」嘅動作背後嘅意義，就係等個提款嘅客人，可以親身睇住啲銀紙嘅數量啱唔啱，大家都睇住計好啱晒數才交收，攞現金就少咗爭拗。
不過，喺英國嘅一次分行攞錢經驗，就令400歲人瑞大開眼界。話說400歲人瑞有日需要前往法國，雖然法國都可以用銀行卡或信用卡付款，但都想搵啲歐元現金以備不時之需，於是乎就諗住去銀行唱歐元順便攞歐元啦。咁開頭都正正常常嘅，排隊到櫃位話要唱錢攞錢，咁櫃員通常都會話：啊攞齊頭啦好嘛（當時我估佢係無乜散紙就ok啦！）。然後就簽個名，咁櫃員就入去倉嗰度攞啲現金出嚟（話晒係外幣咁個櫃位無入去攞都好正常嘅）。到櫃員出嚟嘅時候，400歲人瑞就見到佢攞住一個個信封出嚟，然後就一堆信封隊俾我。400歲人瑞心諗，呢堆信封搞乜嘢？我攞起啲信封一睇，每個信封都封好，信封面有個銀碼，同埋寫咗入面有幾多張咩銀碼嘅銀紙。信封面個銀碼加起嚟，總數就係我提款個銀碼了。
乜料？我點知信封入面啲錢係咪真係嗰個銀碼？你唔駛喺我面前數一次俾我睇㗎咩？如果信封入面啲錢有錯漏，咁400歲人瑞可以點做？係咪呃400歲人瑞初嚟報到？咁我隨便撕開一個信封對下入面，係啱嘅⋯⋯。咁咁咁但係如果唔啱嘅話，點算？400歲人瑞要喺呢度再儲多啲人生經驗才反應得到。
第二單，咁呢單就係400歲人瑞嘅朋友嘅攞錢經驗。話說呢位朋友住嘅地方離銀行分行較遠，但又要攞外幣，咁點算呢？竟然俾佢發現原來銀行有一個服務，係喺網上銀行預訂外幣，然後會送到府上。呢個咁體貼嘅服務，朋友當然第一時間體驗！撳晒掣，安排好邊日咩時間嚟之後，就安坐家中等啲錢自己行埋嚟。果然係指定嘅時間，就有個貌似速遞嘅人嚟到撳門鐘，好快手交咗個信封俾朋友，然後叫朋友簽收，然後就走了。朋友心諗：就係咁？
係囉！就係咁？完全唔駛核對開門嗰個人嘅身份（喺呢度送錯郵件都時會發生，好彩係咁啱我朋友自己開門），簽名只係作簽收用途，又唔核對一下，就係咁就俾咗包外幣現金俾開門嗰位然後就走咗，會唔會太兒戲？
400歲人瑞只能慨嘆自己見識少，世界之大，真係要好好適應一下呢度嘅生活思考模式，有好多嘢唔係行香港我哋習慣以為係啱嘅嗰套⋯⋯
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
留言、給讚、追蹤、分享，請往Facebook專頁：https://www.facebook.com/thames400
