雅虎香港財經 太唔是何｜有種「着數」戶口 要趁後生開！｜400歲人瑞
最近400歲人瑞啲朋友傾開理財儲錢計劃，除咗一般大家都認識嘅Cash ISA（現金儲蓄）同埋Stocks and shares ISA（股票買賣）呢兩類免稅嘅理財戶口之外，年輕一輩更加千祈唔好錯過開Lifetime ISA戶口嘅機會：
Lifetime ISA唔係個個住喺英國嘅居民都開得，好似人瑞呢啲年紀老邁就無呢個福分嘞。佢只係俾18至40歲嘅英國居民開立。
呢類戶口有乜着數呢？就係你每存入£4入戶口，政府就會獎你£1；無錯！即係你存£4,000，政府就會獎你£1,000！係25%啊！
咁樣獎法，當然要有個上限啦！就係每年度最多只可存入£4,000，咁政府最多都係每年度獎你£1,000。
留意返，呢個每年£4,000嘅限額，係計入大家每年只可存£20,000入ISA嘅限額。即係您今年度喺Lifetime ISA戶口存入£4,000後，其他ISA戶口今年度就只可存入總共£16,000。
除咗政府一次性獎25%俾戶口持有人之外，提供Lifetime ISA戶口嘅金融機構都會有利息派俾存戶。人瑞比較過，如果當現金存放，Lifetime ISA戶口個年利率同Cash ISA咁上下。
咁年滿40歲之後，個戶口又點呢？存戶可以繼續每年放最多£4,000，直至50歲為止。喺呢10年裡面，你繼續存入幾多，政府又繼續獎你存入金額嘅25%。
年滿50歲之後，筆錢又點呢？你個戶口會繼續留喺度，繼續賺息。
講咗咁耐，重點嚟啦！俾25%咁大甜頭俾你，你想攞返啲錢當然就無咁容易啦！想攞返晒所有本金、利息連政府25%「獎勵」，就需要符合以下三個條件任何一個：1) 首次置業；2) 年滿60歲；3) 因病而剩返唔夠12個月命。
如果唔係上述三個原因而要攞呢個戶口啲錢，唔係話唔得嘅，要扣返25%手續費囉⋯⋯
睇完上面啲重點，相信你都明白，呢個戶口攞嚟養老係唔錯嘅，簡單清楚明白，而且唔會逼你去投資啲乜嘢基金債券（當然亦可以透過Lifetime ISA去投資呢啲，總算「有得揀」）。自己將來可以攞到幾多，心中有數。
25%聽落去好似好吸引，係咪？但如果你攤返開要存咁多年嚟睇，個年利率就真係「一般般」。又又不過！你原本放£4,000喺戶口收緊£4,000帶來嘅利息，喺呢個戶口入面就會變成收£5,000帶來嘅利息，咁對你嚟講又會唔會吸引啲呢？
對於40歲或以下嘅朋友，人瑞多數都會同佢哋講，唔好理啦！趁自己仲有資格，開咗個戶口先，擺唔擺錢入去，遲啲先再諗啦！
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
留言、給讚、追蹤、分享，請往Facebook專頁：https://www.facebook.com/thames400
